कठुआ : जम्मू आणि काश्मीरमधील कठुआ जिल्ह्यात सुरक्षा दलांनी मोठी कारवाई केली आहे. गुरुवारी झालेल्या या कारवाईत तीन दहशतवादी मारले गेले आहेत. तर तीन पोलिस शहीद झाले आहेत. कठुआ जिल्ह्यातील सुफान भागात ही घटना घडली. पोलिस आणि सुरक्षा दल जंगलात दहशतवाद्यांचा शोध घेत होते. त्यानंतर दहशतवाद्यांनी त्याच्यावर गोळीबार केला. डीएसपी धीरज कटोच आणि इतर दोन पोलिस जखमी झाले. लष्कराच्या १ पॅरा (स्पेशल फोर्सेस) चा एक जवानही जखमी झाला आहे. परिसराला वेढा घालून अतिरिक्त सुरक्षा दल तैनात करण्यात आले आहेत. (Kathua encounter)

अधिकाऱ्यांनी सांगितले की, शहीद पोलिसांमध्ये एक हेड कॉन्स्टेबल आणि दोन कॉन्स्टेबलचा समावेश आहे. अद्याप ऑपरेशन सुरू असल्याने त्यांचे मृतदेह घटनास्थळावरून काढण्यात आलेले नाहीत. परिसरात ग्रेनेड आणि रॉकेट हल्ले झाले. अनेक स्फोट झाले. रात्री उशिरा एका अधिकाऱ्याने सांगितले की, दिवसभर गोळीबार सुरू होता. जखमी सुरक्षा कर्मचाऱ्यांना कठुआ आणि जम्मू येथील रुग्णालयात नेण्यात आले आहे. त्यांची प्रकृती स्थिर असल्याचे सांगण्यात येत आहे.

शोध मोहिमेचा चौथा दिवस होता

रविवारी संध्याकाळी हिरा नगर सेक्टरमधील सान्याल गावाजवळ झालेल्या चकमकीनंतर पळून गेलेला हल्लेखोर तोच गट असल्याचे मानले जात आहे. सुफानची जंगले सान्याल गावापासून सुमारे ३५ किलोमीटर अंतरावर आहेत. सुरक्षा दलांनी दहशतवाद्यांना डोंगराळ झोपडीत घेरले होते. या झोपड्या भटक्या मेंढपाळांनी बांधल्या आहेत.

पण दहशतवादी तेथून पळून गेले, त्यानंतर संपूर्ण परिसरात शोध मोहीम सुरू करण्यात आली. शोध मोहिमेचा आज चौथा दिवस होता. लष्कर, एनएसजी, बीएसएफ, सीआरपीएफ आणि जम्मू-काश्मीर पोलिसांनी आधुनिक पाळत ठेवणारी उपकरणे, बुलेटप्रूफ वाहने, यूएव्ही, ड्रोन आणि स्निफर डॉगचा वापर केला.