पुणे: सांस्कृतिक शहर अशी ओळख असलेल्या पुण्यामध्ये मागील काही महिन्यांपासून सातत्याने गुन्हेगारीच्या घटना समोर येत आहेत. यातच आता पुण्यातील वर्दळीचे ठिकाण असलेल्या स्वारगेट बसस्थानकात एका तरुणीवर बलात्कार करण्यात आल्याची धक्कादायक घटना समोर आली आहे.

प्राथमिक माहितीनुसार, स्वारगेट बसस्थानकात उभ्या असलेल्या शिवशाही बसमध्ये 26 वर्षीय तरुणीवर बलात्कार झाल्याची घटना घडली आहे. ही घटना मंगळवारी (25 फेब्रुवारी) पहाटेच्या सुमारास घडली.

पीडित तरूणीला स्वारगेटवरून फलटणला जायचे होते. यासाठी ती बसस्थानकावर आली. यावेळी एका व्यक्तीने बस दुसऱ्या बाजूला लागल्याचे सांगत बसमध्ये नेले. तरुणी एकटीच असल्याचा फायदा उचलत नराधमाने भयानक कृत्य केले. त्यानंतर आरोपी फरार झाला. स्वारगेट सारख्या गर्दीच्या ठिकाणी अशाप्रकारची घटना घडल्याने शहरात खळबळ उडाली आहे.

दरम्यान, याप्रकरणात स्वारगेट पोलीस ठाण्यात तक्रार दाखल करण्यात आली आहे. अज्ञात आरोपीविरोधात तक्रार दाखल करण्यात आली असून, पोलिस सीसीटीव्ही फुटेजच्या माध्यमातून प्रकरणाचा तपास करत आहेत. आरोपींचा शोध घेण्यासाठी पोलिसांची काही पथकं रवाना करण्यात आली आहे.