Pimpri-Chinchwad: पिंपरी-चिंचवडमध्ये भारत सीरीज; अंतर्गत २४, ९६५ वाहनांची नोंदणी
गेल्या सहा वर्षांत वाढता आलेख : चारचाकींचे प्रमाण सर्वाधिक

पिंपरी – देशभरात एकाच नोंदणी क्रमांकावर वाहन चालविण्याची सुविधा देणाऱ्या भारत सीरिजला (बीएच) पिंपरी-चिंचवड शहरात चांगला प्रतिसाद मिळत आहे. ही योजना सुरू झाल्यापासून पिंपरी-चिंचवड उपप्रादेशिक परिवहन कार्यालयात (आरटीओ) आतापर्यंत २४ हजार ९६५ वाहनांची बीएच सीरिजअंतर्गत नोंदणी झाली आहे.
यामध्ये हलक्या मोटार वाहनांचे प्रमाण सर्वाधिक असून, १६ हजार ५६८ चारचाकी, तर ८ हजार ३९७ दुचाकींची नोंदणी झाली आहे. नोकरीच्या निमित्ताने वारंवार राज्याबाहेर बदली होणाऱ्या नोकरदारांसाठी ही सीरिज सोयीची ठरते.
विविध उद्योग, कंपन्या आणि खासगी आस्थापनांमध्ये देशाच्या वेगवेगळ्या भागांतील कर्मचारी काम करतात, अशा कर्मचाऱ्यांना बदलीनंतर वाहनाच्या पुनर्नोंदणीसाठी करावी लागणारी प्रक्रिया टाळता यावी, यासाठी केंद्र सरकारने सप्टेंबर २०२१ मध्ये बीएच सीरिज सुरू केली.
आरटीओच्या आकडेवारीनुसार, २०२१-२२ मध्ये २७७ वाहनांची नोंदणी झाली होती. २०२२-२३ मध्ये हा आकडा २ हजार ८११, तर २०२३-२४ मध्ये ६ हजार ३०३ वर पोहोचला.
२०२४-२५ मध्ये ३ हजार २०८ वाहनांची नोंदणी झाली. त्यानंतर २०२५-२६ मध्ये सर्वाधिक ७ हजार ६५ वाहनांची नोंद झाली. चालू आर्थिक वर्ष २०२६-२७ मध्ये आतापर्यंत ५ हजार ३०१ वाहनांची नोंदणी झाली आहे. बीएच सीरिजमध्ये आतापर्यंत नोंदणी झालेल्या २४ हजार ९६५ वाहनांपैकी १६ हजार ५६८ हलकी मोटार वाहने, तर ८ हजार ३९७ दुचाकी आहेत.
एकूण नोंदणीमध्ये चारचाकी वाहनांचा वाटा सुमारे ६६ टक्के आहे. चालू आर्थिक वर्षातही ३ हजार ४२३ हलकी मोटार वाहने, तर १ हजार ८७८ दुचाकींची नोंदणी झाली आहे.
कोणाला मिळतो बीएच नंबर
केंद्र आणि राज्य सरकारी कर्मचारी, संरक्षण दलातील कर्मचारी तसेच चार किंवा त्यापेक्षा अधिक राज्ये अथवा केंद्रशासित प्रदेशांमध्ये कार्यालये असलेल्या खासगी कंपन्यांतील पात्र कर्मचाऱ्यांना बीएच सीरिजचा लाभ घेता येतो. दुसऱ्या राज्यात बदली झाल्यानंतर वाहनाची पुनर्नोंदणी करण्याची गरज नसते, तसेच रस्ता कर दोन वर्षांच्या टप्प्यांमध्ये भरता येतो.
बीएच सीरीज नंबरसाठी अटी पूर्ण करणाऱ्या पात्र व्यक्तीस ऑनलाइन अर्ज करावा लागतो, यासाठी वाहन विक्रेता खरेदीदाराच्या वतीने वाहन पोर्टलवर ऑनलाइन फॉर्म भरतात. त्यासाठी आवश्यक कागदपत्रे सादर करावी लागतात. डीलर सर्व आवश्यक कागदपत्रे आणि त्यासाठी आवश्यक शुल्क किंवा मोटार वाहन कर भरल्यानंतर आरटीओकडून मंजुरी मिळते.
विक्री करताना अडचण
बीएच सीरिजचे वाहन विकताना सर्वात मोठी अडचण खरेदीदाराच्या पात्रतेची आणि पुन्हा राज्य नोंदणी करण्याची येते. नियमांनुसार, बीएच नंबर प्लेट वाहनाशी नव्हे तर मालकाशी जोडलेली असते, त्यामुळे विक्रीची प्रक्रिया सामान्य वाहनांपेक्षा थोडी क्लिष्ट होते. बीएच नंबर कायम ठेवून वाहन विकायचे असल्यास, खरेदीदार देखील बीएच सीरीजसाठी पात्र असणे बंधनकारक आहे.
त्यामुळे ग्राहकांची संख्या खूप मर्यादित राहते. जर खरेदीदार बीएच सीरीजसाठी पात्र नसेल तर वाहन विकण्यापूर्वी किंवा विकताना ते संबंधित राज्याच्या सामान्य सीरिजमध्ये (उदा. एमएच) रूपांतरित करावे लागते. यासाठी सध्याचा बीएच क्रमांक जमा करून नवीन नंबर घ्यावा लागतो.
Special Train : कार्तिकी एकादशी यात्रेनिमित्त विशेष रेल्वे धावणार





