मैदुगुरी, (नाजयेरिया) – नायजेरियाच्या इशान्येकडील मैदुगुरी शहरामध्ये सोमवारी झालेल्या आत्मघातकी बॉम्बस्फोटात किमान २३ जण ठार झाले. नायजेरियामध्ये अलिकडच्या काळात झालेला हा सर्वात भीषण दहशतवादी हल्ला होता. बोर्नो राज्याची राजधानी मैदुगुरी येथील गर्दीच्या ठिकाणी तीन स्फोट झाले. एका प्रमुख बाजारपेठेत आणि मैदुगुरी विद्यापीठाच्या शिक्षण रुग्णालयाच्या प्रवेशद्वाराजवळ देखील स्फोट झाले. या सर्व बॉम्बस्फोटांमध्ये २३ जण ठार आणि किमान १०८ जण जखमी झाले. असे पोलिसांनी सांगितले. bomb-blast या हल्ल्यांची जबाबदारी कोणत्याही गटाने स्वीकारलेली नाही, परंतु बोको हराम या जिहादी गटावर या हल्ल्याचा संशय आहे. याच गटाने २००९ मध्ये शरियाची अंमलबजावणी करण्यासाठी ईशान्य नायजेरियामध्ये बंडखोरी सुरू केली. अतिरेक्यांनी नायजेरियन लष्करी तळांवरील हल्ले तीव्र केले असून, अनेक वरिष्ठ अधिकारी आणि सैनिकांना ठार केले आहे, तसेच तळांवरील शस्त्रसाठा आणि दारुगोळा लुटला आहे.
