Kedarnath Temple – दिल्लीच्या बुराडी परिसरात बाबा केदारनाथ यांचे प्रतिकात्मक मंदिर बांधले जाणार आहे. यावरून आता उत्तरेत राजकारण तापले आहे. या नव्या मंदिरामुळे केदारनाथ धाम येथे नाराजी पसरली असून त्यांनी या नव्या मंदिराला विरोध दर्शविला आहे. त्यातच बद्रीनाथ ज्योतिर्मठ पीठाचे शंकराचार्य स्वामी अविमुक्तेश्वरानंद यांनी आज केदारनाथ मंदिरातून चोरी झालेल्या सोन्याचा मुद्दा उपस्थित करत टीका केली.

मुंबईत त्यांनी शिवसेनेचे नेते आणि माजी मुख्‍यमंत्री उद्धव ठाकरे यांची भेट घेतली. यानंतर त्‍यांनी माध्यमांशी बोलताना विविध राजकीय विषयांसह धार्मिक विषयावरही सडेतोड भाष्य केले. शंकराचार्य स्वामी अविमुक्तेश्वरानंद म्हणाले, केदारनाथ मंदिरात २२८ किलो सोन्याचा घोटाळा झाला आहे.

यावर माध्यमे आवाज का उचलत नाहीत. आता दिल्लीत नवे केदारनाथ मंदिर बांधायची तयारी सुरू आहे. म्हणजे तिथेही नवा घोटाळा करणार का? केदारनाथ मंदिरातील सोन्याची चोरी झाल्यानंतर त्याचा तपास करण्यासाठी समिती का नाही स्थापन केली? असाही प्रश्न त्यांनी उपस्थित केला.

दरम्यान, उत्तराखंडचे मुख्यमंत्री आणि भाजपाचे नेते पुष्कर सिंह धामी यांनीही दिल्लीतील मंदिर निर्माणाला विरोध केला आहे. बाबा केदारनाथ धाम जगात इतर कुठेही दुसरे बनू शकत नाही. तसेच जर केवळ केदारनाथ मंदिर बांधले जात असेल तर त्याला आमचा विरोध नाही, पण केदारनाथ धाम एकच असेल. यासाठी त्यांनी बद्री केदारनाथ धाम समितीला यात लक्ष घालून दिल्लीतील मंदिर समितीशी चर्चा करण्याची सूचना केली.