2019 Gadchiroli Naxal Attack Case – २०१९ मध्ये गडचिरोली येथे झालेल्या आयईडी स्फोटात १५ पोलिसांच्या मृत्यू प्रकरणातील आरोपी ‘कैलाश रामचंदानी’ याला सर्वोच्च न्यायालयाने मंगळवारी अंतरिम जामीन मंजूर केला. मुख्य न्यायाधीश सूर्यकांत आणि न्यायमूर्ती जयमाल्य बागची यांच्या खंडपीठाने विविध अटींवर दिलासा दिला. रामचंदानी २९ जून २०१९ पासून तुरुंगात असून अद्याप आरोप निश्चित झाले नसल्याची बाब लक्षात घेऊन हा निर्णय देण्यात आला. राष्ट्रीय तपास यंत्रणेने (एनआयए) आरोपीची प्रकरणात महत्त्वाची भूमिका असल्याचा दावा केला होता. न्यायालयाच्या आदेशानुसार, रामचंदानीला गडचिरोलीतील मूळ गावी राहावे लागेल आणि विशेष एनआयए न्यायालयाच्या परवानगीशिवाय जिल्ह्याबाहेर जाता येणार नाही. सुनावणीसाठीच त्याला गडचिरोलीबाहेर जाण्याची मुभा देण्यात आली आहे. तसेच त्याला आठवड्यातून एकदा स्थानिक पोलिस ठाण्यात हजर राहणे, मोबाइल क्रमांक पोलिसांना देणे आणि खटल्यात स्थगिती न मागणे बंधनकारक आहे. जामिनाच्या अटींचे उल्लंघन झाल्यास एनआयएला दिलासा रद्द करण्याचा अधिकार देण्यात आला आहे. ‘कैलाश रामचंदानी’ कोण आहे? कैलाश रामचंदानी हा २०१९ मध्ये महाराष्ट्रातील गडचिरोली येथे झालेल्या नक्षलवादी हल्ल्याशी संबंधित प्रकरणातील एक आरोपी आहे. तो गडचिरोली जिल्ह्यातील एक व्यापारी आणि स्थानिक राजकीय कार्यकर्ता (माजी एनसीपी नेता) आहे. १ मे २०१९ रोजी गडचिरोलीतील जांभूरखेडा येथे झालेल्या आयईडी (IED) स्फोटात १५ पोलीस जवान आणि १ चालक शहीद झाले होते. या हल्ल्यात नक्षलवाद्यांना मदत केल्याचा आणि पोलिसांच्या हालचालींची माहिती नक्षलवाद्यांपर्यंत पोहोचवल्याचा आरोप त्याच्यावर आहे. त्याला २९ जून २०१९ रोजी अटक करण्यात आली होती. राष्ट्रीय तपास यंत्रणेने (NIA) त्याच्यावर बेकायदेशीर कृत्य प्रतिबंधक कायद्यांतर्गत (UAPA) गुन्हा दाखल केला आहे. दीर्घकाळ तुरुंगात राहिल्यामुळे आणि खटल्याला होत असलेल्या विलंबामुळे, ६ जानेवारी २०२६ रोजी सर्वोच्च न्यायालयाने त्याला काही अटींनुसार अंतरिम जामीन मंजूर केला आहे.
