नवी दिल्ली – जवाहरलाल नेहरू विद्यापिठामध्ये आंदोलन करण्यावर आता बंदी घालण्यात आली आहे. विद्यापिठापासून १०० मीटरच्या आवारात पोस्टर चिकटवल्यास किंवा धरणे आंदोलन केल्यास २० हजार रुपयांचा दंड किंवा विद्यापिठातून हकालपट्टीदेखील केली जाऊ शकेल. या नियमांचा भंग करून कोणत्याही देशविरोधी कृत्याबद्दल १० हजार रुपयांचा दंड देखील होऊ शकतो, असे विद्यापिठाच्या नव्या मॅन्युएलमध्ये म्हटले आहे.

विविध शाळा असलेल्या या शैक्षणिक इमारतींमध्ये वर्गखोल्या आणि प्रयोगशाळांव्यतिरिक्त अध्यक्ष, अधिष्ठाता आणि इतर महत्त्वाच्या पदाधिकाऱ्यांची कार्यालये आहेत.

पूर्वी, उच्च न्यायालयाच्या आदेशानुसार कुलगुरू, कुलसचिव आणि प्रॉक्टर यांची कार्यालये असलेल्या प्रशासकीय ब्लॉकच्या 100 मीटरच्या आत निदर्शने करण्यास मनाई होती. तथापि, सुधारित चीफ प्रॉक्टर ऑफिस मॅन्युअलनुसार, विद्यापीठाने आता शैक्षणिक इमारतींच्या 100 मीटरच्या आत तसेच जेथे वर्ग चालवले जातात तेथे आंदोलन, निदर्शने करण्यास मनाई केली आहे. धर्म, जात किंवा समुदायाप्रती असहिष्णुता भडकवणारे कोणतेही कृत्य किंवा “देशविरोधी” समजले जाणारे कृत्य केल्यास 10 हजार रुपयांचा दंड ठोठावला जाईल.

ऑक्टोबरमध्ये जेएनयूमध्ये शाळेच्या इमारतीच्या भिंतीवर “देशविरोधी” घोषणा रंगवल्या गेल्या होत्या. त्यानंतर हे नियम केले गेले आहेत. प्रशासनाने विद्यापिठाच्या आवारामध्ये वारंवार घडणाऱ्या अशा घटनांवर उपाय योजना करण्यासाठी एक समिती स्थापन करण्याची घोषणा केली. जेएनयू विद्यार्थी संघटनेने या नवीन नियमांना विरोध केला आहे. मतभेदांना दाबण्याचा हा प्रयत्न असल्याचे विद्यार्थी संघटनेने म्हटले आहे. या संदर्भातील प्रश्‍नांना जेएनयूच्या रजिस्ट्रारनी कोणताही प्रतिसाद दिला नाही.