पिंपरी – वाहनचालकांना पाठविण्यात आलेले वाहन चालविण्याचे परवाने संबंधित पत्त्यावर पोहोचू न शकल्याने ते टपाल विभागाकडून प्रादेशिक परिवहन कार्यालयाकडे (आरटीओ) परत येतात. अशा परत आलेल्या परवान्यांची नोंद आरटीओच्या गहाळ खात्यात केली जाते. जानेवारी ते जून २०२६ या सहा महिन्यांच्या कालावधीत १ हजार २० वाहन चालविण्याचे परवाने गहाळ खात्यात जमा झाले आहेत.

वाहन चालविण्याचा परवाना तयार झाल्यानंतर तो संबंधित वाहनचालकाच्या नोंदणीकृत पत्त्यावर टपालाद्वारे पाठविला जातो. मात्र, पत्ता अपूर्ण असणे, संबंधित व्यक्ती त्या पत्त्यावर राहत नसणे किंवा अन्य कारणांमुळे परवान्याचे वितरण होऊ शकत नाही. अशा वेळी हे परवाने टपाल विभागाकडून आरटीओ कार्यालयात परत पाठविले जातात.

परवाने परत आल्यानंतर ते संबंधित कार्यालयाच्या गहाळ खात्यात जमा केले जातात. त्यामुळे परवाना तयार होऊनही तो हातात न पडलेल्या वाहनचालकांना तो मिळविण्यासाठी आरटीओ कार्यालयाशी संपर्क साधावा लागू शकतो. वाहनचालकांनी परवाना काढताना आपला पत्ता अचूक नोंदविणे आणि पत्त्यात बदल झाल्यास आवश्यक ती दुरुस्ती करून घेणे महत्त्वाचे आहे.

YCM Hospital: वायसीएमचे डॉक्टर तर्राट…? शवविच्छेदन विभागात ‘दारूचा अड्डा’ -टेबलावर मद्याच्या बाटल्या