पिंपरी –  पिंपरी-चिंचवड महापालिकेच्या यशवंतराव चव्हाण स्मृती रुग्णालयातील (वायसीएम) शवविच्छेदन विभागात डॉक्टर आणि कर्मचारी मद्यपान करून मद्यधुंद अवस्थेत झोपल्याचा धक्कादायक प्रकार समोर आला आहे. या विभागातील टेबलावर मद्याच्या बाटल्या पडलेल्या असून, डॉक्टर आणि कर्मचारी झोपलेल्या अवस्थेतील व्हिडिओ सोशल मीडियावर व्हायरल झाला आहे. एका मृत व्यक्तीच्या नातेवाइकांनी हा व्हिडिओ चित्रित केल्याचे सांगण्यात येत आहे. या प्रकारामुळे महापालिकेच्या वैद्यकीय यंत्रणेच्या कार्यपद्धतीवर गंभीर प्रश्न उपस्थित होत असून, वायसीएम प्रशासनाच्या जबाबदारीवरही टीका होऊ लागली आहे.

वायसीएम हे महापालिकेचे महत्त्वाचे रुग्णालय आहे. याठिकाणी राज्यातील कानाकोपऱ्यातून रुग्ण उपचारासाठी येत असतात. उपचारांसाठी येणाऱ्या रुग्णांप्रमाणेच मृतदेहांच्या शवविच्छेदनाची प्रक्रियाही अत्यंत संवेदनशील असते. अशा विभागात शिस्त, जबाबदारी आणि संवेदनशीलता राखणे अपेक्षित आहे. मात्र, शवविच्छेदन विभागातील कथित प्रकाराचा व्हिडिओ समोर आल्याने या अपेक्षांनाच हरताळ फासला जात असल्याची टीका होत आहे.

समोर आलेल्या व्हिडिओमध्ये टेबलावर मद्याच्या बाटल्या दिसत आहेत. तसेच त्याठिकाणी खाद्यपदार्थ देखील आहे. त्याच्या बाजूला असलेल्या सोफ्यांवर डॉक्टर व कर्मचारी झोपलेले आहेत. ते बोलत असताना त्यांनी मद्यप्राशन केल्याचे स्पष्ट होत आहे. मृत व्यक्तीच्या नातेवाइकांनी हा प्रकार चित्रित केल्याने रुग्णालयातील अंतर्गत परिस्थितीबाबत प्रश्न निर्माण झाले आहेत. इतक्या संवेदनशील ठिकाणी डॉक्टर व कर्मचाऱ्यांची असंवेदनशीलता मनाला चटका लावणारी आहे.

प्रशासनाचे नियंत्रण नेमके कुठे?
महापालिकेच्या रुग्णालयात डॉक्टर आणि कर्मचाऱ्यांच्या कामकाजावर नियंत्रण ठेवण्याची जबाबदारी संबंधित विभागप्रमुख आणि रुग्णालय प्रशासनाची असते. असे प्रकार घडत असल्याचा आरोप समोर येत असेल, तर विभागातील उपस्थिती, ड्युटी रोस्टर, सीसीटीव्ही फुटेज आणि संबंधित कर्मचाऱ्यांच्या जबाबांची तपासणी करणे गरजेचे आहे. केवळ चौकशीची घोषणा करून हा विषय संपविण्याऐवजी वस्तुस्थिती स्पष्ट करून दोषी आढळणाऱ्यांवर नियमानुसार कारवाई करणे आवश्यक आहे.

नागरिकांच्या विश्वासाला तडा
मृत व्यक्तीच्या नातेवाइकांसाठी हा प्रसंग आधीच दुःखद असतो. अशा वेळी शवविच्छेदन विभागात गैरप्रकार होत असल्याचे चित्र समोर आल्यास त्यांच्या मनात प्रशासनाबद्दल अविश्वास निर्माण होणे स्वाभाविक आहे. या प्रकरणाची तातडीने निष्पक्ष चौकशी करून व्हिडिओतील दृश्यांची सत्यता तपासली जाणार का, संबंधित डॉक्टर व कर्मचाऱ्यांची जबाबदारी निश्चित होणार का आणि भविष्यात अशा घटना रोखण्यासाठी ठोस उपाययोजना केल्या जाणार का, हे प्रश्न आता उपस्थित होत आहेत.

यांना बजावली नोटीस
याप्रकरणी शवविच्छेदन विभागाचे इनचार्ज असलेल्या डॉ. श्रीकांत शिंगे यांना याबाबत सविस्तर अहवाल देण्याची नोटीस देण्यात आली आहे. तर व्हिडिओमध्ये दिसत असलेले डॉ. म्हस्के यांना कारणे दाखवा नोटीस देण्यात आली आहे. या नोटीसमध्ये घडलेल्या प्रकाराबाबत १२ तासांत खुलासा करण्यास सांगितले आहे.

‘वायसीएम रुग्णालयातील व्हिडिओची गंभीर दखल घेतली आहे. याप्रकरणात संबंधित डॉक्टर व कर्मचारी यांना नोटीस देण्यात आली आहे. त्यांंचा खुलासा आल्यानंतर याप्रकरणी कारवाईचा प्रस्ताव आयुक्तांकडे पाठविण्यात येईल. संबंधितावर कारवाई करण्यात येईल.’- कुलदीप जंगम, अतिरिक्त आयुक्त.

Satara: सातारा बसस्थानकाच्या पुनर्बांधणीचा मार्ग मोकळा; दसऱ्यापासून कामाला सुरुवात