पुणे : पुण्यात काँग्रेसला धक्क्यावर धक्के बसताना दिसत आहे. गेल्या काही दिवसांपूर्वी कसबा विधानसभा मतदारसंघाचे माजी आमदार रवींद्र धंगेकर यांनी काँग्रेस पक्षाला सोडचिट्ठी देत शिवसेना शिंदे गटात प्रवेश केला. त्यानंतर आता काँग्रेसला देखील गळती लागल्याची चर्चा शहरात आहे. महाराष्ट्र प्रदेश युवक काँग्रेसचे सरचिटणीस रोहन सुरवसे पाटील व एनएसयुआय पुणे सरचिटणीस कृष्णा साठे यांच्यासह पक्षातील अन्य १०० पदाधिकारी येत्या २ ते ३ दिवसात राजीनामा देणार असल्याची माहिती सुत्रांनी दिली आहे. गेल्या काही दिवसांपासून विरोधी पक्षातील पदाधिकारी सत्ताधारी पक्षांमध्ये प्रवेश करताना राज्यभर दिसून येत आहेत. भारतीय जनता पक्ष, राष्ट्रवादी काँग्रेस अजित पवार गट अथवा शिवसेना शिंदे गटात प्रवेश होत आहेत. गेल्या काही दिवसांपूर्वीच सुरवसे पाटील हे काँग्रेस पक्षाला रामराम ठोकणार अशी बातमी समोर आली होती. आता पक्षप्रवेशाची तारीख निश्चित झाली असून, येत्या २ ते ३ दिवसांमध्ये सुरवसे यांच्यासह युवक काँग्रेसचे १०० पदाधिकारी राजीनामा देत दुसऱ्या पक्षात प्रवेश करणार आहेत. विश्वसनीय सुत्रांनुसार येत्या आठवड्यात या पदाधिकाऱ्यांचा राष्ट्रवादी काँग्रेस अजित पवार गटात प्रवेश होणार असल्याचे बोलले जात आहे. काँग्रेसमध्ये अंतर्गत कुजबूज दरम्यान, पक्षप्रवेशाची तारीख निश्चित झाली असून, येत्या २ ते ३ दिवसांमध्ये सुरवसे पाटलांसह युवक काँग्रेसचे १०० पदाधिकारी राजीनामा देत दुसऱ्या पक्षात प्रवेश करणार असल्याची माहिती मिळत आहे. यामुळे आता पुण्यात कोंग्रेस पक्षाला मोठे खिंडार पडल्याचे बोलले जात आहे. पुण्यातील कोंग्रेस पक्षात विधानसभा निवडणुकीपूर्वीपासून अंतर्गत कुजबूज असल्याच्या बातम्या समोर आल्या होत्या. सुरवसे पाटलांच्या पक्षप्रवेशाच्या बातमीमुळे कॉँग्रेसमध्ये काही आलबेल नसल्याचे पुन्हा एकदा समोर आले आहे. भास्करराव पाटील खतगावकर करणार राष्ट्र्वादीत प्रवेश माजी मुख्यमंत्री खासदार अशोक चव्हाण यांचे मेहुणे माजी खासदार भास्करराव पाटील खतगावकर काँग्रेसला रामराम ठोकून राष्ट्रवादी काँग्रेस अजित पवार गटात प्रवेश करणार आहेत. पाडव्यापूर्वी म्हणजेच येत्या २३ मार्चला नांदेड जिल्ह्यातील नायगाव-नरसी येथे खतगावकर हे आपल्या असंख्य समर्थकांसह राष्ट्रवादीत प्रवेश करणार आहेत. या पक्षप्रवेश सोहळ्यासाठी उपमुख्यमंत्री अजित पवार, राष्ट्रवादीचे प्रदेशाध्यक्ष सुनील तटकरे, सहकार मंत्री बाबासाहेब पाटील यांच्यासह अनेक वरिष्ठ नेते उपस्थित असणार आहेत. प्रताप पाटील चिखलीकर यांच्या माध्यमातून भास्करराव पाटील खतगावकर यांचा पक्षप्रवेश होणार आहे. त्यांच्यासोबत सुनबाई मीनल खतगावकर आणि माजी आमदार ओमप्रकाश पोकर्णा हे देखील राष्ट्रवादी अजित पवार गटात प्रवेश करणार आहेत. 2014 साली लोकसभेसाठी काँग्रेसची उमेदवारी न मिळाल्याने भास्करराव खतगावकर भाजपमध्ये सामील झाले होते. पण भाजपामध्ये अडगळीत पडल्याने खतगावकर पुन्हा काँग्रेसमध्ये सामील झाले होते. दरम्यान, माजी खासदार आणि माजी आमदाराच्या पक्षप्रवेशामुळे नांदेडमध्ये काँग्रेसला मोठा धक्का बसला आहे.
