EVM Machine : भारतात वापरली जाणारी इलेक्ट्रॉनिक मतदान यंत्रे (ईव्हीएम) इंटरनेट, ब्लूटूथ किंवा वाय-फायशी जोडलेली (EVM Machine) नसतात, असे मुख्य निवडणूक आयुक्त ज्ञानेश कुमार यांनी सोमवारी स्पष्ट केले. लखनौ दौऱ्यात ऐतिहासिक कॉल्विन तालुकदार कॉलेजमधील विद्यार्थ्यांशी संवाद साधताना त्यांनी ईव्हीएमची निर्मिती आणि निवडणूक प्रक्रियेबाबत माहिती दिली.

भारतामधील ईव्हीएम (EVM Machine) सार्वजनिक क्षेत्रातील कंपन्यांकडून तयार केली जातात आणि त्यामध्ये कोणत्याही प्रकारची इंटरनेट किंवा वायरलेस कनेक्टिव्हिटी नसते, असे ज्ञानेश कुमार यांनी सांगितले. ईव्हीएमच्या विश्वासार्हतेबाबत विद्यार्थ्यांनी विचारलेल्या प्रश्नांना उत्तर देताना त्यांनी ही माहिती दिली.

सोशल मीडियाच्या युगात कोणतीही माहिती स्वीकारण्यापूर्वी तिचा स्रोत आणि सत्यता तपासणे आवश्यक असल्याचेही त्यांनी सांगितले. माहिती पुढे पाठवण्यापूर्वी तिची पडताळणी करण्याचा सल्ला त्यांनी तरुणांना दिला.

भारताच्या निवडणूक प्रक्रियेच्या व्यापकतेचा उल्लेख करताना कुमार म्हणाले की, देशात सुमारे १०० कोटी मतदार आहेत. एवढ्या मोठ्या मतदारसंख्येसाठी निवडणुका घेणे हे मोठे आव्हान असून, प्रक्रिया सुरळीत पार पाडण्यासाठी मोठ्या संख्येने अधिकारी आणि कर्मचारी कार्यरत असतात. तरुणांनी लोकशाही प्रक्रियेत सक्रिय सहभाग घ्यावा, असे आवाहन त्यांनी केले.

संविधानाच्या कलम ३२६चा संदर्भ देत १८ वर्षे पूर्ण झालेल्या तरुणांनी मतदार म्हणून नोंदणी करावी, असे त्यांनी सांगितले. आयोगाच्या डिजिटल माध्यमातून मतदार नोंदणीची (EVM Machine) सुविधा उपलब्ध असल्याचेही त्यांनी नमूद केले. ज्ञानेश कुमार यांनी तरुणांना कुटुंबीय आणि मित्रांनाही मतदानासाठी प्रोत्साहित करण्याचे आवाहन केले. तरुणांचा जागरूक सहभाग लोकशाही अधिक बळकट करेल, असे ते म्हणाले.