Raviraj Sable : युवा शेतकरी नेते आणि समाजमाध्यमांवरील प्रभावी व्यक्तिमत्त्व रविराज साबळे यांनी औरंगाबाद विभाग पदवीधर मतदारसंघातून अपक्ष म्हणून निवडणूक लढवण्याचा निर्णय जाहीर केला आहे. समाजमाध्यमावर पोस्ट करत त्यांनी राजकारणात प्रवेश करण्याची घोषणा केली. पदवीधरांच्या प्रश्नांसाठी निवडणूक लढवण्याचा निर्णय घेतल्याचे त्यांनी सांगितले.

रविराज साबळे हे धाराशिव जिल्ह्यातील भूम तालुक्यातील कृषी उद्योजक म्हणूनही परिचित आहेत. शेतीमध्ये आधुनिक आणि नाविन्यपूर्ण प्रयोग करत त्यांनी तरुणांना शेतीकडे व्यवसाय म्हणून पाहण्याचा संदेश दिला आहे. शेतीविषयक तसेच विविध सामाजिक प्रश्नांवरही त्यांनी समाजमाध्यमातून भूमिका मांडली आहे.

निवडणुकीत उतरण्याबाबतच्या पोस्टमध्ये त्यांनी म्हटले आहे की, केवळ राजकारणापासून दूर राहून परिस्थिती बदलणार नाही. विद्यार्थी आणि पदवीधरांच्या प्रश्नांसाठी प्रत्यक्ष मैदानात उतरून लढण्याची गरज असल्याचे सांगितले. ही लढाई मोठी असली तरी अशक्य नसल्याचेही म्हटले.

आपल्याकडे मोठी आर्थिक ताकद, निवडणूक यंत्रणा किंवा कार्यकर्त्यांचे जाळे नसले तरी लढण्याची जिद्द आहे. पदवीधरांच्या हक्कांसाठी अपक्ष म्हणून निवडणूक लढवणार असल्याचे स्पष्ट करत समर्थकांनी प्रचारात सहभागी होण्याचे आवाहनही केलेय.

दरम्यान, २०२६ च्या पदवीधर मतदारसंघ निवडणुकीची प्रक्रिया सुरू झाली असून २२ सप्टेंबरपासून संबंधित भागात आदर्श आचारसंहिता लागू असल्याची माहिती जिल्हा प्रशासनाने दिली आहे.

पदवीधर निवडणूक कशी होते? कोण मतदान करू शकते?

महाराष्ट्र विधान परिषदेच्या पदवीधर मतदारसंघात पदवीधर मतदार थेट मतदान करून आमदार निवडतात. भारताचा नागरिक, संबंधित मतदारसंघाचा सामान्य रहिवासी आणि अर्हता दिनांकाच्या किमान तीन वर्षे आधी पदवीधर झालेला व्यक्ती मतदार म्हणून नोंदणी करू शकतो.

या निवडणुकीसाठी स्वतंत्र पदवीधर मतदारयादी असते. मतदारांनी त्यात नाव असणे आवश्यक आहे. उमेदवारांचे अर्ज, छाननी, माघार, मतदान आणि मतमोजणी असे टप्पे होतात. मतदान प्राधान्यक्रम पद्धतीने होते; मतदार उमेदवारांना १, २, ३ असा क्रम देतो. एकूण मतांमध्ये आवश्यक कोटा मिळवणारा उमेदवार विजयी ठरतो. २०२६ च्या औरंगाबाद विभाग पदवीधर मतदारसंघाची निवडणूक अधिसूचना २९ सप्टेंबरला प्रसिद्ध झाली आहे.

निवडणूक कार्यक्रम महत्वाच्या तारखा –