Breaking News – मुंबईत इंधन दरवाढ, एलपीजी सिलिंडरच्या वाढलेल्या किमती आणि एकूणच महागाईविरोधात आज महाविकास आघाडीच्या कार्यकर्त्यांनी जोरदार आंदोलन केले. सरकारविरोधात घोषणाबाजी करत आंदोलक रस्त्यावर उतरल्याने शहरातील काही भागांमध्ये तणावाचे वातावरण निर्माण झाले.

या आंदोलनात मोठ्या संख्येने कार्यकर्ते सहभागी झाले होते. विशेषतः महिला कार्यकर्त्यांनी रस्त्यावरच चुल मांडून चपात्या तयार करत अनोख्या पद्धतीने निषेध नोंदवत सरकारच्या धोरणांवर टीका केली.

आंदोलनादरम्यान आंदोलक आणि पोलिसांमध्ये काही ठिकाणी धक्काबुक्की आणि गोंधळाची परिस्थिती निर्माण झाली. परिस्थिती नियंत्रणात ठेवण्यासाठी पोलिसांनी मोठा बंदोबस्त तैनात केला होता. त्यानंतर काही आंदोलकांना ताब्यात घेण्यात आले.

मिळालेल्या माहितीनुसार, या कारवाईदरम्यान खासदार सुप्रिया सुळे, आमदार रोहित पवार आणि माजी मंत्री जितेंद्र आव्हाड यांनाही पोलिसांनी ताब्यात घेतल्याची माहिती समोर आली आहे. मात्र, या संदर्भात पोलिसांकडून अधिकृत पुष्टी अद्याप करण्यात आलेली नाही.

आंदोलनामुळे काही काळ मुंबईतील वाहतुकीवर परिणाम झाला. यावेळी अनेक प्रमुख मार्गांवर वाहतूक कोंडी निर्माण झाली होती. आंदोलकांनी महागाईमुळे सामान्य नागरिक त्रस्त असल्याचे सांगत, इंधन दर तातडीने कमी करावेत आणि एलपीजी दरवाढ मागे घ्यावी अशी मागणी केली.