Prithviraj Chavan – देशातील शिक्षण व्यवस्था, परीक्षा पद्धती आदी मुद्दे ऐरणीवर आल्याच्या पार्श्‍वभूमीवर माजी मुख्यमंत्री पृथ्वीराज चव्हाण यांनी रोखठोक भूमिका मांडली. त्यांनी देशाला पूर्णवेळ शिक्षण मंत्र्याची गरज असल्याचे भाष्य केले.

कॉक्रोच जनता पार्टीच्या (सीजेपी) पुढाकारातून जेन-झीने नुकतेच दिल्लीतील जंतर-मंतर परिसरात तीव्र आंदोलन केले. त्याचा परिणाम म्हणून भाजपचे नेते धर्मेंद्र प्रधान यांना केंद्रीय शिक्षण मंत्रिपदाचा राजीनामा द्यावा लागला. त्यानंतर केंद्रीय मंत्री प्रल्हाद जोशी यांच्याकडे शिक्षण खात्याचा अतिरिक्त कार्यभार सोपवण्यात आला.

संबंधित घडामोडींचा आधार घेऊन कॉंग्रेसचे ज्येष्ठ नेते चव्हाण यांनी सोशल मीडियावरून परखड मत मांडले. जोशी यांच्याकडे तात्पुरत्या स्वरूपाचा कार्यभार देण्यात आला. संसदेच्या पावसाळी अधिवेशनापुरती ती व्यवस्था केली गेल्याचे वाटते. पंतप्रधान नरेंद्र मोदी यांना लवकरच पूर्णवेळ शिक्षण मंत्र्याची नियुक्ती करावी लागेल.

कोलमडून पडलेली शिक्षण व्यवस्था सावरण्यासाठी जेन-झीशी कनेक्ट होऊ शकणाऱ्या राष्ट्रीय स्तरावरील व्यक्तीकडे ती जबाबदारी सोपवली जावी. मात्र, केंद्रीय मंत्रिमंडळात तशी व्यक्ती दिसत नाही, अशी टिप्पणी त्यांनी केली.

राज्याचे मुख्यमंत्री देवेंद्र फडणवीस यांच्याकडे केंद्रीय शिक्षण मंत्रिपदाची धुरा सोपवली जाऊ शकते, असे तर्क-वितर्क सुरू आहेत. मात्र, केंद्रीय शिक्षण मंत्री म्हणून फडणवीस यांना जेन-झी आणि कॉंग्रेस स्वीकारणार नाही, अशी स्पष्टोक्ती चव्हाण यांनी केली.

नीट पेपरफुटी प्रकरणाचे धागेदोरे महाराष्ट्रापर्यंत पोहचले. फडणवीस यांच्याकडे राज्याच्या गृह खात्याची जबाबदारी आहे. ती बाब विचारात घेता फडणवीस यांच्याविषयीच्या विश्‍वासाचा मुद्दा उपस्थित होईल, असे त्यांनी अधोरेखित केले. उद्योग जगतातील नंदन नीलेकणी यांच्यासारख्या व्यक्तीचा विचार शिक्षण मंत्रिपदासाठी होऊ शकेल, असेही त्यांनी सूचित केले.