Marathwada – राज्यात पावसात मोठा खंड पडल्याने धरणांमधील पाणीसाठा कमी होत आहे. यामुळे मराठवाड्यात दुष्काळाच्या झळा आता तीव्र होत आहेत. पावसाअभावी पिके हातातून गेली आहेत. दुसरीकडे पिण्याच्या पाण्याचे चटके जाणवू लागले आहे.

बीड धाराशिव परभणीसह अनेक जिल्ह्यातील गावांमध्ये नद्या, तलाव कोरडेठाक पडू लागले आहेत. पुन्हा एकदा मराठवाड्यात सर्वात कमी पाणीसाठा शिल्लक राहिला असून, भीषण पाणीटंचाईकडे हा विभाग वाटचाल करत आहे.

जलसंपदा विभागाच्या माहितीनुसार, मराठवाड्यातील धरणांमध्ये गेल्यावर्षी ऑक्टोबरच्या सुरुवातीला 85.62% पाणीसाठा शिल्लक होता. यावर्षी हा पाणीसाठा राज्यातील सर्वात कमी 43.66% नोंदवण्यात आला आहे. राज्यातील सर्वात मोठे धरण असणाऱ्या जायकवाडी धरणात सध्या 77.08% पाणीसाठा शिल्लक आहे.

धरणाच्या डाव्या आणि उजव्या कालव्यातून सोडले जाणारे पाणी हे प्रामुख्याने शेतीसाठी वापरले जाते. छत्रपती संभाजीनगर व जालना शहर आणि परिसरातील शेकडो गावांना पिण्याच्या पाण्याचा पुरवठा जायकवाडी धरणातून होतो.

दुष्काळाची दाहकता वाढत असून, येत्या काही दिवसात हा पाणीसाठा वर्षभर कसा पुरेल? अशी चिंता व्यक्त केली जात आहे. गेल्या चार महिन्यात बीडमध्ये एक ते दोन वेळा पाऊस पडला. परिणामी आता नद्या कोरड्या पडू लागल्या आहेत.

धरणांतील पाणीसाठा…

पावसाअभावी बीडच्या वाण नदीचे पात्र कोरडे पडले आहे. वाण प्रकल्पाला पाणी आल्यानंतर वर्षातून किमान दोन वेळा ही नदी प्रवाहित होते. मात्र यंदा पाऊस नसल्याने वाण धरणातच अत्यल्प पाणीसाठा आहे.

माजलगाव धरणातला पाणीसाठा 27.98 टक्क्यांवर आला आहे. गेल्यावर्षी याच सुमारास धरण्यात 98% पाणीसाठा होता. मांजरा धरण दहा टक्क्यांवर आले आहे.

हिंगोलीतील सिद्धेश्वर धरण शून्यावर गेले आहे. येलदरी धरणात सध्या 61.72% पाणीसाठा शिल्लक आहे. मागच्या वर्षी याच सुमारास 99% धरण भरले होते. नांदेडमधील विष्णुपुरी धरणात 83.65% तर, निम्नमनार 61.59% भरले आहे.

धाराशिव जिल्ह्यातील निम्न तेरणा 21.83 टक्क्यांवर आहे. सीना कोळेगाव शुन्यावर आहे. परभणीतील निम्न दुधना 19.86 टक्क्यांवर स्थिरावले आहे. एकूण मराठवाड्यातील लहान मोठ्या सर्व धरणांमधला पाणीसाठा 43.66 % आहे.