Pune :  श्री पूना गुजराती बंधू समाजातर्फे दहावी, बारावी तसेच उच्च शिक्षणात उल्लेखनीय यश संपादन केलेल्या विद्यार्थ्यांचा गौरव समारंभ कोंढवा येथील जयराज स्पोर्ट्स अँड कन्व्हेन्शन सेंटर येथे उत्साहात पार पडला. उद्योगपती तथा विश्वकर्मा ग्रुपचे अध्यक्ष आणि महालक्ष्मी मंदिराचे ट्रस्टी भरत अग्रवाल यांच्या हस्ते विद्यार्थ्यांचा सन्मान करण्यात आला.

यावेळी समाजाचे अध्यक्ष जयंत शहा, कार्यकारी संचालक डॉ. राजेश शहा, सहकार्यकारी संचालक नैनेश नंदू, सचिव राजेंद्र शहा, खजिनदार हरेश शहा आदी मान्यवर उपस्थित होते.

समारंभात दहावी, बारावी आणि उच्च शिक्षणात यश मिळविलेल्या विद्यार्थ्यांना सन्मानचिन्ह देऊन गौरविण्यात आले. तसेच यंदापासून विशेष क्रीडा विभागात उल्लेखनीय कामगिरी करणाऱ्या विद्यार्थ्यांचाही विशेष सत्कार करण्यात आला.

याप्रसंगी बोलताना भरत अग्रवाल म्हणाले, “समाजमाध्यमे तरुणांच्या विचार प्रक्रियेवर परिणाम करीत असून, अनेकदा विचारांची दिशा भरकटविण्याचे काम करतात. तंत्रज्ञान हे माणसासाठी आहे, माणूस तंत्रज्ञानासाठी नाही, याची जाणीव प्रत्येक तरुणाने ठेवणे आवश्यक आहे.”

राष्ट्रीय शैक्षणिक धोरणामुळे शिक्षण व्यवस्थेत मोठी लवचिकता आली असून, त्याचा लाभ घेत व्यवसाय आणि छंद यांची सांगड घालणे गरजेचे असल्याचे त्यांनी सांगितले. ध्येय निश्चित करून सातत्याने प्रयत्न केल्यास संकल्पपूर्ती शक्य असल्याचेही त्यांनी नमूद केले.

डॉ. राजेश शहा म्हणाले, “गुजरात समाज उद्योग क्षेत्रातील सचोटी आणि कर्तृत्वासाठी ओळखला जातो. उद्योगासोबतच शिक्षण आणि बौद्धिक क्षेत्रातही समाजाने आपले वेगळेपण सिद्ध करावे. यशाला मर्यादा नसतात. एका यशानंतर पुढील ध्येय गाठण्याची प्रेरणा मिळत राहते.”

या कार्यक्रमास ट्रस्टी हेमंत मेहता, जनक शहा, केतन कापडिया, विनोद देडिया, दिलीप मेहता, सौ. हंसा शहा यांच्यासह विद्यार्थी आणि पालक मोठ्या संख्येने उपस्थित होते.

कार्यक्रमाच्या प्रारंभी नैनेश नंदू यांनी उपस्थितांचे स्वागत करून पाहुण्यांचा परिचय करून दिला. राजेंद्र शहा यांनी आभार मानले, तर अनुजा सेलोट यांनी सूत्रसंचालन केले.