Navratri Festival : ‘आई तुझ्या ग चरणी… आई गोंधळाला ये…’ या गाण्याच्या तालावर पुणेकरांनी ‘माता माता की जय’चा जयघोष केला. श्री महालक्ष्मी मंदिर, सारसबागच्या वतीने अष्टलक्ष्मीची भव्य रथयात्रा काढण्यात आली. मंदिरासमोर पुष्पवृष्टी आणि भंडाऱ्याची उधळण करत रथयात्रेचे स्वागत करण्यात आले. या मिरवणुकीत शेकडो देवीभक्तांनी उत्साहाने सहभाग घेतला.

श्री महालक्ष्मी मंदिर, सारसबागच्या सार्वजनिक नवरात्रोत्सवात हा विशेष सोहळा आयोजित करण्यात आला होता. यावेळी मंदिर ट्रस्टचे प्रमुख संस्थापक विश्वस्त राजकुमार अग्रवाल, प्रमुख विश्वस्त अमिता अग्रवाल, विश्वस्त व उत्सव प्रमुख डॉ. तृप्ती अग्रवाल, भरत अग्रवाल, ॲड. प्रताप परदेशी, प्रवीण चोरबेले, हेमंत अर्नाळकर यांच्यासह विश्वस्त, पदाधिकारी आणि कार्यकर्ते सहभागी झाले.

नवरात्रातील मंगळवारचे धार्मिक महत्त्व लक्षात घेऊन प्रथमच अशा प्रकारची वैविध्यपूर्ण अष्टलक्ष्मी रथयात्रा काढण्यात आली. या मिरवणुकीला नागरिक आणि देवीभक्तांचा उत्स्फूर्त प्रतिसाद मिळाला.

उत्सव प्रमुख डॉ. तृप्ती अग्रवाल यांनी सांगितले की, श्री महाकाली, श्री महालक्ष्मी आणि श्री महासरस्वती या आदिशक्तीच्या त्रिदेवी स्वरूपाचे पवित्र स्थान म्हणून श्री महालक्ष्मी मंदिराची ओळख आहे. मंदिरात यापूर्वी अष्टलक्ष्मी रथयात्रेचे आयोजन झाले नव्हते. त्यामुळे यंदा प्रथमच हा विशेष सोहळा आयोजित करण्यात आला.

मंदिरासमोर पुष्पवृष्टी करून रथयात्रेचे उत्साहात स्वागत करण्यात आले. विश्वकर्मा विद्यापीठातील पदाधिकारी, मंदिराचे कार्यकर्ते तसेच राजेश अंबिके आणि शेखर निवंगुणे यांच्या सहकार्याने हा सोहळा पार पडला.

दरम्यान, मंदिराबाहेर दररोज सायंकाळी ७.३० वाजता गंगा आरतीचे आयोजन करण्यात येत आहे. या आरतीलाही नागरिकांचा चांगला प्रतिसाद मिळत आहे.