वडगाव मावळ : सोशल मीडिया, मोबाइल आणि इंटरनेटच्या वाढत्या वापरामुळे वाचनाची सवय कमी होत असल्याची चर्चा असतानाच मावळ तालुक्यातील ग्रामीण भागात पोथी वाचनाची परंपरा आजही कायम आहे.

श्रावण महिन्यात घरोघरी तसेच मंदिरांमध्ये आबालवृद्ध एकत्र येऊन पोथी वाचन आणि निरूपण ऐकतात. त्यामुळे धार्मिकतेसोबतच सांस्कृतिक आणि जीवनमूल्यांची शिकवणही पुढील पिढीपर्यंत पोहोचत आहे.

श्रावण महिना धार्मिक परंपरांसाठी महत्त्वाचा मानला जातो. नागपंचमी, रक्षाबंधन, श्रीकृष्ण जन्माष्टमी यांसह या काळात भजन, हरिपाठ, पूजापाठ आणि पोथी वाचनाचे आयोजन केले जाते. अनेक गावांमध्ये सायंकाळच्या वेळी नागरिक मंदिरात किंवा घरांमध्ये एकत्र येतात. पूर्वी पोथी वाचन हे गावच्या सामाजिक जीवनाचा अविभाज्य भाग होते.

दिवसभर शेतीची कामे केल्यानंतर गावकरी सायंकाळी एकत्र येत. पोथी वाचनातून अध्यात्मिक, नैतिक आणि सांस्कृतिक विचारांची देवाणघेवाण होत असे. त्यामुळे गावातील सामाजिक एकोपा वाढण्यासही मदत होत असे.

मोबाईल, इंटरनेट आणि कृत्रिम बुद्धिमत्तेच्या युगात प्रत्यक्ष संवाद कमी होत असताना मावळातील वारंगवाडीसारख्या गावांमध्ये ही परंपरा अजूनही सुरू आहे. संतांचे विचार, सुविचार आणि संस्कृतीची ओळख नव्या पिढीला करून देण्याचे काम या माध्यमातून होत आहे.

श्रावणातील पावसाळी संध्याकाळ, मंदिराची ओसरी, एकत्र जमलेली मंडळी आणि पोथीच्या ओव्यांचा आवाज, हे ग्रामीण जीवनातील जुने चित्र आजही अनेक गावांत पाहायला मिळते. वर्षानुवर्षे जपली गेलेली ही परंपरा जुन्या पिढीकडून पुढील पिढीकडे आलेला मौल्यवान सांस्कृतिक ठेवा ठरत आहे.

श्रावणातील पावसाळी संध्याकाळ, घराच्या किंवा मंदिराच्या ओसरीवर जमलेली मंडळी, पोथीचा आवाज आणि प्रत्येक ओवीचा समजावून सांगितला जाणारा अर्थ, हे ग्रामीण जीवनातील परिचित चित्र होते. काळ बदलला तरी अनेक गावांत ही परंपरा आजही सुरू असल्याने वाचन, श्रवण आणि संस्कारांची वीण कायम आहे.

Pune District : दुर्बिणीद्वारे कुटुंब कल्याण शस्त्रक्रिया सुरू