North Korea – उत्तर कोरियाने रविवारी समुद्राच्या दिशेने दोन कमी पल्ल्याची बॅलिस्टिक क्षेपणास्त्रे डागली, अशी माहिती दक्षिण कोरियाच्या लष्कराने दिली.

गेल्या महिन्यात दक्षिण कोरियाबरोबरच्या संयुक्त युद्धसरावातून अध्यक्ष डोनाल्ड ट्रम्प यांनी अंशतः माघार घेतल्यानंतरही उत्तर कोरियाकडून चिथावणीखोरपणे बॅलिस्टिक क्षेपणास्त्रे डागणे सुरूच ठेवले आहे.

ही दोन क्षेपणास्त्रे सुमारे तीन तासांच्या अंतराने उत्तर कोरियाच्या पूर्व किनारपट्टीवरील वॉनसान भागातून सोडण्यात आली होती. पहिले क्षेपणास्त्र सुमारे ४५० किलोमीटर तर दुसरे ६०० किलोमीटरहून अधिक अंतरावर पडले.

दोन्ही क्षेपणास्त्रे उत्तरेच्या पूर्वेकडील समुद्राच्या दिशेने गेली आणि समुद्रात पडली, असे दक्षिण कोरियाच्या लष्कराने सांगितले.

दक्षिण कोरियाच्या राष्ट्रपती कार्यालयाने उत्तर कोरियाला, संयुक्त राष्ट्र सुरक्षा परिषदेच्या ठरावांद्वारे प्रतिबंधित असलेले बॅलिस्टिक क्षेपणास्त्र प्रक्षेपण तात्काळ थांबवण्याचे आवाहन केले आहे.

तसेच उत्तर कोरियाच्या कोणत्याही चिथावणीखोर कृतीला प्रत्युत्तर देण्याची आपली क्षमता असल्याचेही दक्षिण कोरियाने म्हटले आहे.