शिरूर : शिरूर तालुक्यातील जिल्हा परिषदेच्या ७ गटांसाठी आणि पंचायत समितीच्या १४ गणांसाठी निवडणूक प्रक्रिया गतिमान झाली आहे. शिरूर तहसील कार्यालयात उमेदवारी अर्ज स्वीकारण्यास सुरुवात झाली असून, निवडणूक काळात उमेदवारांनी आदर्श आचारसंहितेचे काटेकोर पालन करावे, असे आवाहन निवडणूक निर्णय अधिकारी विठ्ठल जोशी व सहाय्यक निवडणूक अधिकारी बाळासाहेब म्हस्के यांनी केले आहे. अर्ज विक्रीचा आकडा वाढला, मात्र अर्ज दाखल शून्य निवडणूक कार्यालयाने दिलेल्या माहितीनुसार, जिल्हा परिषद गटांसाठी ३७ तर पंचायत समिती गणांसाठी १२० उमेदवारी अर्जांची विक्री झाली आहे. मात्र, अद्याप एकही अर्ज अधिकृतपणे दाखल झालेला नाही. उमेदवारी अर्ज १६ जानेवारी ते २१ जानेवारी या कालावधीत तहसीलदार दालनात स्वीकारले जातील. प्रशासन सज्ज: २१९० कर्मचाऱ्यांची नियुक्ती – या निवडणुकीसाठी तालुक्यात एकूण ३३७ मतदान केंद्रे निश्चित करण्यात आली असून, दिलासादायक बाब म्हणजे यात एकही संवेदनशील किंवा अतिसंवेदनशील केंद्र नाही. निवडणुकीच्या यशस्वी आयोजनासाठी प्रशासनाने कंबर कसली असून एकूण २१९० कर्मचारी तैनात करण्यात आले आहेत. यामध्ये ४३८ केंद्राध्यक्ष, १३१४ मतदान अधिकारी, २१ या समन्वय अधिकारी आणि ४३८ शिपायांचा समावेश आहे. नियुक्त कर्मचाऱ्यांचे तीन टप्प्यांत प्रशिक्षण पूर्ण केले जाणार आहे. पोलीस प्रशासनाची कडक कारवाई – निवडणूक शांततेत पार पाडण्यासाठी पोलीस खाते सतर्क झाले आहे. प्रतिबंधात्मक कारवाई म्हणून रांजणगाव पोलीस स्टेशन अंतर्गत ३५, शिरूर पोलीस स्टेशन ५० आणि शिक्रापूर पोलीस स्टेशन अंतर्गत ३६ जणांवर कारवाई करण्यात आली आहे. ईव्हीएम आणि वाहतूक व्यवस्था – निवडणुकीसाठी लागणारे ईव्हीएम यंत्र रांजणगाव एमआयडीसी (कारेगाव) येथील राज्य वखार महामंडळाच्या गोडाऊन क्रमांक २ मध्ये ठेवण्यात आले आहेत, तर मतमोजणी याच ठिकाणच्या गोडाऊन क्रमांक ३ मध्ये पार पडणार आहे. निवडणूक साहित्याच्या आणि कर्मचाऱ्यांच्या वाहतुकीसाठी ५५ एसटी बस, ४० जीप आणि २ मिनी बस अशा एकूण ९७ वाहनांची व्यवस्था करण्यात आली असल्याची माहिती विठ्ठल जोशी यांनी दिली. निवडणुकीचे वेळापत्रक आणि प्रक्रिया – अर्ज छाननी: २२ जानेवारी (सकाळी ११ वाजता) अर्ज माघारी: २३ जानेवारी ते २७ जानेवारी चिन्ह वाटप: २७ जानेवारी (दुपारी ३:३० नंतर) मतदान : 5 फेब्रुवारी मतमोजणी : 7 फेब्रुवारी
