प्रभात वृत्तसेवा
राजुरी – जुन्नर तालुक्यातील राजुरी-बेल्हे जिल्हा परिषद गट नागरिकांचा मागास प्रवर्ग महिलांसाठी आरक्षित झाला असून, बेल्हे गण नागरिकांचा मागास प्रवर्ग पुरुष तर राजुरी गण सर्वसाधारणसाठी आरक्षित आहे. या गटात इच्छुकांची संख्या मोठी झाल्याने, कोण कोणत्या पक्षाकडून उमेदवारी मिळवणार आणि कोण निवडणुकीला सामोरे जाणार? या चर्चांना सध्या उधाण आले आहे. अनेक उमेदवारांनी गावोगावी तसेच सोशल मीडियावर प्रचाराला सुरुवात केली आहे.

या गटातून माजी जिल्हा परिषद सदस्या स्नेहल वल्लभ शेळके राष्ट्रवादी काँग्रेस (पवार गट) कडून तर शिवसेनेतून (शिंदे गट) आमदार शरद सोनवणे यांचे निकटवर्तीय पंकज कणसे यांच्या पत्नी स्मिता पंकज कणसे धनुष्यबाण हाती घेणार आहेत. जुन्नर पंचायत समितीचे माजी सभापती स्व. राजाभाऊ गुंजाळ यांच्या पत्नी माधुरी राजाभाऊ गुंजाळ या शिवसेना (उबाठा) गटाकडून मशाल चिन्ह घेऊन लढण्याच्या तयारीत आहेत.

राष्ट्रवादी काँग्रेस (अजित पवार गट) कडून माजी आमदार अतुल बेनके यांचे निकटवर्तीय एम. डी. घंगाळे यांच्या कुटुंबातून प्रमिला घंगाळे, जयसिंग औटी यांच्या पत्नी सुप्रिया औटी, गुळुंचवाडीच्या सरपंच नीलम भांबेरे, मनीषा खिलारी आणि वर्षा पिंगट उमेदवारी मिळवण्यासाठी प्रयत्नशील आहेत. भाजपाकडून राजुरी गावचे माजी सरपंच संजय गवळी यांच्या पत्नी शांता संजय गवळी यांना उमेदवारी मिळण्याची शक्यता आहे. पंचायत समितीसाठीही इच्छुकांची मोठी संख्या असल्याने सध्या गावागावांत राजकीय चर्चांना मोठे उधाण आले आहे.

या गटामध्ये समाविष्ट असणारी गावे..
राजुरी- बेल्हे या गटामध्ये राजुरी, उंचखडक, गुळुंचवाडी, नळवणे, आणे, पेमदारा, शिंदेवाडी, बेल्हे, गुंजाळवाडी, बांगरवाडी, तांबेवाडी, रानमळा, साकोरी तर्फे बेल्हे, मंगरूळ व झाप या गावांचा समावेश आहे.

गटातील समस्या..
या गटात बिबट्यांची मोठी समस्या आहे. तसेच विजेचा प्रश्न, दुष्काळग्रस्त आणे पठारावर पाण्यासाठी पाठपुरावा करणे, शेतीमालाला बाजार भाव, रस्ते आणि आरोग्याच्या समस्या या गटामध्ये प्रामुख्याने आहेत.