ढाका : वादग्रस्त इस्लामी व्याख्याता झाकिर नाईक महिन्याभरासाठी बांगलादेशच्या दौऱ्यावर जाणार आहे. मुख्य सल्लागार डॉ. मुहम्मद युनूस यांच्या सरकारने नाईक याच्या भेटीसाठी अनुमती दिली आहे. नाईक २८ नोव्हेंबरपासून २० नोव्हेंबर पर्यंत बांगलादेशमध्ये असणार आहे. बांगलादेशात २०१६ साली होली आर्टिसान बेकरीवर दहशतवादी हल्ला झाला होता.

या दहशतवादी हल्ल्याला नाईकची प्रक्षोभक व्याख्याने कारणीभूत असल्याचे निष्पन्न झाल्यावर तत्कालिन पंतप्रधान शेख हसीना यांनी झाकिर नाईकच्या पीस टिव्हीवर बंदी घातली होती. मात्र आता डॉ. मुहम्मद युनूस सरकारने नाईक याच्यासाठी पायघड्या घालण्याचा निर्णय घेतला आहे. नोव्हेंबरच्या अखेरपासून २० डिसेंबरपर्यंतच्या दौऱ्यात झाकिर नाईक बांगलादेशात ठिकठिकाणी जाऊन व्याख्याने देणार आहे.

कट्टर इस्लामी असलेल्या झाकिर नाईक प्रक्षोभक आणि विघातक विचारांचा प्रसार करत असल्याचे मानले जाते. तो आपल्या व्याख्यानामधून सातत्याने बारतविरोधी भूमिका मांडत असतो. त्याच्या पीस टिव्हीवर बंदी घातल्यानंतर ९ वर्षांनी तो उघडपणे बांगलादेशात व्याख्याने देण्यासाठी जाणार आहे. पाकिस्तानने देखील झाकिर नाईकला उघडपणे व्याख्याने देण्यासाठी अनुमती दिलेली नव्हती. असे असताना बांगलादेशने त्याला दौऱ्यासाठी अनुमती दिली आहे.