प्रभात वृत्तसेवा
बेल्हे – जुन्नर तालुक्यातील बोरी-खोडद गटात आगामी जिल्हा परिषद आणि पंचायत समिती निवडणुकीसाठी उमेदवारी मिळविणे हेच इच्छुकांसमोर मोठे आव्हान ठरले आहे. बोरी-खोडद गट नागरिकांचा मागास प्रवर्ग महिला, तर बोरी बुद्रुक गण सर्वसाधारण आणि खोडद गण नागरिकांचा मागास प्रवर्ग महिला राखीव झाल्यामुळे सध्या सर्वच राजकीय पक्षांच्या बैठका आणि पुढारी मंडळींच्या गाठीभेटी सुरू आहेत.

या नवीन गटात जिल्हा परिषदेसाठी तसेच पंचायत समितीसाठी इच्छुकांची संख्या खूप मोठी आहे, त्यामुळे चुरस वाढली आहे. इच्छुकांना प्रत्यक्ष निवडणुकीला सामोरे जाणे अवघड असल्याने पक्षांना उमेदवार निवडताना त्यांचा प्रत्येक गावातील जनसंपर्क, झालेली विकास कामे, पुढील विकासाचे नियोजन, परिसराची भौगोलिक रचना अशा सर्व गोष्टींची जाण असणाऱ्याचा विचार करणे गरजेचे ठरणार आहे.

बोरी बुद्रुक गणातून पंचायत समितीसाठी पारगाव, शिरोली, बोरी, औरंगपूर गावांना संधी मिळण्याची शक्यता असून खोडद गणात खोडद, वडगाव, बोरी बुद्रुक, कांदळी गावातून विद्यमान, माजी सरपंच किंवा तरुण नेतृत्वाला संधी मिळणार असल्याची शक्यता वर्तविली जात आहे. जिल्हा परिषद गटासाठी पुणे जिल्हा परिषदेचे माजी उपाध्यक्ष पांडुरंग पवार यांच्या सून कविता संदीपान पवार, जुन्नर कृषी उत्पन्न बाजार समितीचे संचालक भास्कर गाडगे यांच्या पत्नी संगीता भास्कर गाडगे, बोरी खुर्दच्या सरपंच कल्पना वैभव काळे, वडगाव कांदळीच्या आदर्श सरपंच उल्का श्रीकांत पाचपुते यांसह अनेक महिला इच्छुक आहेत. ऐनवेळी पक्षाचे तिकीट कुणाला मिळते हे पाहणे औत्सुक्याचे ठरणार आहे.

लढत राष्ट्रवादी-शिवसेना (उबाठा) पक्षात
राज्यात शिवसेना आणि राष्ट्रवादी काँग्रेसमध्ये दोन गट पडले असले तरी, बोरी-खोडद गटात खरी लढत राष्ट्रवादी काँग्रेस (अजित पवार) व शिवसेना (उद्धव बाळासाहेब ठाकरे) यांच्यातच होईल, असे चित्र सध्या दिसत आहे. कोण कोणाच्या गळ्यात हात घालून निवडणुकीला सामोरे जाणार, हे पुढील काळच ठरवेल.