Alpha Movie: बॉलिवूड अभिनेत्री आलिया भट्ट सध्या तिच्या आगामी ‘अल्फा’ या चित्रपटामुळे चांगलीच चर्चेत आहे. यशराज फिल्म्सच्या (YRF) स्पाय युनिव्हर्समधील हा बहुप्रतिक्षित चित्रपट असून नुकताच त्याचा टीझर प्रदर्शित झाला आहे. टीझर रिलीज झाल्यापासून चाहत्यांमध्ये चित्रपटाबद्दलची उत्सुकता आणखी वाढली आहे. विशेष म्हणजे ‘अल्फा’ हा YRF स्पाय युनिव्हर्समधील पहिला महिला-केंद्रित चित्रपट मानला जात आहे.

या चित्रपटाचे दिग्दर्शन शिव रवैल यांनी केले आहे. आलिया भट्टसोबत अभिनेत्री शर्वरी वाघ आणि अभिनेता बॉबी देओल यांच्याही महत्त्वाच्या भूमिका या चित्रपटात पाहायला मिळणार आहेत. चित्रपटाची कथा आणि कलाकारांच्या भूमिकांबरोबरच आता त्यांच्या मानधनाचीही चर्चा रंगली आहे.

शर्वरी वाघबद्दल बोलायचे झाले तर, टीझरमध्ये तिची झलक दिसली नसली तरी ती चित्रपटात एका पाकिस्तानी गुप्तहेराच्या भूमिकेत दिसणार असल्याची चर्चा आहे. रिपोर्ट्सनुसार, या भूमिकेसाठी शरवरीने सुमारे ३ कोटी रुपयांचे मानधन घेतले आहे. प्रमुख कलाकारांमध्ये सर्वात कमी फी तिलाच मिळाल्याचे सांगितले जात आहे.

दुसरीकडे, बॉबी देओल यांना या चित्रपटासाठी शर्वरीपेक्षा दुप्पट मानधन मिळाले आहे. त्यांनी ‘अल्फा’साठी सुमारे ६ कोटी रुपये फी घेतल्याची माहिती समोर आली आहे. चित्रपटात ते आलिया भट्टच्या वडिलांच्या भूमिकेत दिसणार आहेत. तसेच एका महत्त्वाच्या मिशनसाठी आलियाला प्रशिक्षण देणारी व्यक्ती म्हणूनही त्यांची भूमिका महत्त्वाची असणार आहे.

मात्र सर्वाधिक चर्चा होत आहे ती आलिया भट्टच्या मानधनाची. ‘अल्फा’ची मुख्य नायिका असलेल्या आलियाने या चित्रपटासाठी तब्बल २५ ते ३० कोटी रुपये फी घेतल्याचे सांगितले जात आहे. चित्रपटाचे एकूण बजेट सुमारे ८० कोटी रुपये असल्याची माहिती आहे. त्यातील जवळपास एक तृतीयांश रक्कम केवळ आलियाच्या मानधनावर खर्च झाल्याचे म्हटले जात आहे.

गेल्या काही वर्षांत आलियाने अनेक हिट चित्रपट दिले आहेत. त्यामुळे मोठ्या बजेटच्या आणि महत्त्वाच्या प्रोजेक्टसाठी निर्मात्यांची पहिली पसंती ती ठरत आहे. ‘अल्फा’मधील तिच्या भूमिकेकडेही चाहत्यांचे विशेष लक्ष लागले आहे.

एकंदरीत, ‘अल्फा’ हा केवळ अॅक्शन आणि स्पाय थ्रिलर चित्रपट नसून YRF स्पाय युनिव्हर्समधील एक महत्त्वाचा टप्पा मानला जात आहे. आलिया भट्ट, शर्वरी वाघ आणि बॉबी देओल यांची दमदार स्टारकास्ट, मोठे बजेट आणि वेगळी कथा यामुळे हा चित्रपट आधीपासूनच चर्चेचा विषय ठरला आहे. आता चित्रपट प्रदर्शित झाल्यानंतर तो बॉक्स ऑफिसवर किती कमाल करतो, याकडे सर्वांचे लक्ष लागले आहे.