Stuti Sonwane : मुंबईतील एका तरुणीने प्रियकराच्या सततच्या जाचाला कंटाळून आपल्या आयुष्याचा शेवट केला. ८ मार्च रोजी महिलादिनाच्या दिवशीच डॉ. स्तुती सोनावणे या तरुणीने राहत्या घरी गळफास घेत आत्महत्या केली. या घटनेने संपूर्ण महाराष्ट्रात एकच खळबळ उडाली आहे. या आत्महत्याप्रकरणी तरुणीच्या प्रियकराला अटक करण्यात आली असून, मुंबईतील अँटॉप हिल पोलीस ठाण्यात गुन्हा दाखल करण्यात आला आहे. या प्रकरणी पोलिसांनी फझल मोहम्मद खान (३१) याला अटक केली असून त्याच्यावर तरुणीला आत्महत्येस प्रवृत्ती केल्याप्रकरणी गुन्हा दाखल करण्यात आला आहे. आता पोलिसांनी केलेल्या चौकशीत एक धक्कादायक माहिती समोर आली आहे. तरुणीच्या सुसाईड नोटमध्ये अप्रत्यक्षपणे श्रद्धा वालकर मर्डर केसचा उल्लेख असल्याचे समोर आला आहे. “तू एक दिवस फ्रिज मध्ये सापडशील” अशी धमकी वारंवार प्रियकर स्तृतीला देत असायचा ही बाब तिने आपल्या मैत्रिणीला सांगितली होती. पोलिस या प्रकरणाचा वेगवेगळ्या अँगलनी तपास करीत असून, आता या आत्महत्या प्रकरणात कोणती नवीन माहिती समोर येते हे पाहावे लागेल. डॅा. स्तुती सोनावणे आत्महत्या प्रकरणात पोलिसांना घटनास्थळावरुन सहा पानांची सुसाईड नोट सापडली आहे. यामध्ये स्तुतीने तिला होत असलेल्या त्रासाबद्दल लिहिले आहे. फजल मोहम्मद खान याच्याकडून सतत मानसिक त्रास देत असल्याचा उल्लेख आहे. डेडिंग अॅपवरुन झाली ओळख स्तुती आणि मोहम्मद खान यांची एकमेकांशी ओळख एका डेटिंग अॅपवरुन झाली. त्यानंतर दोघांची मैत्री वाढत गेली आणि गेल्या वर्षभरापासून दोघेही रिलेशनशिपमध्ये होते. या दोघांमध्ये भांडणे व्हायची. त्यावेळी फजल खान तिला मारुन टाकण्याची धमकी द्यायचा, असे पोलिसांचे म्हणणे आहे. दरवाजा उघडला अन्… या सगळ्या त्रासामुळे स्तुती तणावात होती. ८ मार्चच्या दिवशी स्तुतीचे आई-वडील जेवण्यासाठी बाहेर गेले होते. हे दोघे घरी परत आल्यावर स्तुती तिच्या खोलीचा दरवाजा उघडत नव्हती. त्यावेळी स्मृतीच्या वडिलांनी खोलीचा दरवाजा तोडला असता स्तुतीने गळफास घेतल्याचे निदर्शनास आले. या प्रकरणाची माहिती पोलिसांना मिळाल्यानंतर पोलिस घटनास्थळी दाखल झाले. त्यांनी पंचनामा करुन स्तुती सोनावणे हिचा मृतदेह ताब्यात घेतला. शवविच्छेदन अहवालानुसार स्तुतीने गळफास घेऊन आत्महत्या केल्याचे स्पष्ट झाले आहे. पोलिसांनी अटक केलेल्या फजल मोहम्मद खान याला न्यायालयाने एका दिवसाची पोलिस कोठडी सुनावली आहे. त्याच्या चौकशीतून आणखी कोणती माहिती समोर येणार याकडे लक्ष असणार आहे. हेही वाचा : Dance: फिटनेस आणि आनंदाचा मंत्र: नाचल्याने ताण तर कमी होतोच पण आत्मविश्वास आणि तंदुरुस्ती दोन्ही वाढते
