पुणे : पुण्यात आज राज्य कुटुंब कल्याण भवन व प्रशिक्षण केंद्र या इमारतीचा भूमिपूजन सोहळा उपमुख्यमंत्री अजित पवार यांच्या हस्ते पार पडला. याशिवाय हिंदूहृदयसम्राट बाळासाहेब ठाकरे आपला दवाखाना अंतर्गत नव्या 20 दवाखान्यांचे लोकार्पण करण्यात आले. या कार्यक्रमाला आरोग्य मंत्री प्रकाश आबिटकर देखील कार्यक्रमाला उपस्थित होते. यावेळी आरोग्यमंत्री प्रकाश आबिटकर यांनी अजित पवारांचं कौतुक करत त्यांच्या व्यक्त होण्याच्या शैलीचं कौतुक केलं.

आरोग्यमंत्री प्रकाश आबिटकर म्हणाले, कामाची पध्दत, वेळ आणि जी गोष्ट आवडली नाही त्यावर तिथेच रिऍक्ट होतात, असे तुम्ही एकमेव राजकारणी आहात असं म्हणत अजित पवारांचं कौतुक केलं. आजही दादांनी परीक्षा घेतली की, सकाळी आठ वाजता ते आले. दादा नेहमी आमच्या परीक्षा घेतात आणि आमची अडचण होते, असं प्रकाश आबिटकर म्हणाले.

राज्याची आरोग्य यंत्रणा आम्हाला सुधारायची आहे. पुणे हे आरोग्य विभागाचं दुसर सेंटर आहे. अनेक योजनाची अंमलबजावणी पुण्यातून होते. कामकाज होत होतं, पण एकत्रित कार्यालय नसल्याने अडचणी येत होत्या, म्हणून हे नवं भवन आज उभारत आहोत. बाळासाहेब ठाकरे आपला दवाखाना योजनेचे 43 रुग्णालये सुरू करत आहोत, असंही यावेळी आबिटकर यांनी सांगितलं.

सरकार 24 तास जनतेच्या सेवेत : अजित पवार

अजित पवारांनी या कार्यक्रमात बोलताना आमचे सरकार 24 तास जनतेच्या सेवेत असल्याचे सांगितलं. मी पहाटे 4 वाजता उठतो, फिरतो, व्यायाम करतो आणि कामाला सुरुवात करतो. साधारण 10 ते 11 पर्यंत काम करतो. यानंतर मुख्यमंत्री देवेंद्र फडणवीस हे 11 ते 2 काम करतात. तर उपमुख्यमंत्री एकनाथ शिंदे रात्री 2 ते 4 या वेळेत काम करतात. त्यामुळे जनतेच्या समस्या सोडवण्यासाठी आमचे सरकार सदैव तत्पर आहे, असं अजित पवार म्हणाले. Ajit Pawar |

नागरिकांना आवश्यक सुविधा मिळायला पाहिजे

राज्य सरकारची कोणतीही कार्यालये भाडेतत्त्वावर ठेवायची नाहीत, यासाठी प्रयत्न सुरू आहेत. जनतेला उत्तम सुविधा मिळाव्यात, यासाठी महायुती सरकार काम करत आहे. येत्या दोन-तीन वर्षात सर्व इमारतींचे काम पूर्ण झाले पाहिजे. मला सरकारी कार्यालये चांगली करण्याची आवड आहे. नागरिकांना आवश्यक सुविधा मिळायला पाहिजेत. पार्किंगची समस्या मोठी आहे. त्यामुळे आता बांधल्या जाणाऱ्या इमारतींमध्ये पार्किंगची व्यवस्था केली जाईल, असे अजित पवार यांनी सांगितले. Ajit Pawar |

जनतेला जलद आणि पारदर्शक सेवा उपलब्ध करून देणं हे मुख्य उद्दिष्ट

सर्व सरकारी इमारतींवर सौर पॅनेल बसवले जातील आणि वीज निर्मिती कशी करता येईल, याचा विचार सुरू आहे. आरोग्याच्या सर्व सुविधा एकाच छताखाली आणण्याचे काम सुरू आहे. राज्यातील जनतेला जलद आणि पारदर्शक सेवा उपलब्ध करून देणं हे आमचं मुख्य उद्दिष्ट आहे. ससून रुग्णालयाला आवश्यक निधी दिला जात आहे. पुण्यात अनेक प्रशासकीय इमारतींचं काम सुरू आहे. पोलिस आयुक्तालयासाठी १९३ कोटी रुपये, एसपी कार्यालयासाठी ६२ कोटी रुपये खर्च करण्यात येत आहेत, अशी माहिती यावेळी अजित पवार यांनी दिली.