औरंगाबाद : भारतीय जनता पक्षाचे ज्येष्ठ नेते आणि  माजी विधानसभा अध्यक्ष हरिभाऊ बागडे यांनी आता आगामी विधानसभा निवडणूक न लढवण्याची मोठी घोषणा केली आहे. फुलंब्री विधानसभा मतदारसंघातून बागडे यांनी आतापर्यंत सहा वेळ विजय मिळवला आहे. आपल्या 40 वर्षांच्या राजकीय कारकिर्दीत त्यांनी विधानसभा अध्यक्षपदावर देखील काम केले आहे. मात्र आता 77 वर्षांचे झालेल्या  बागडे यांनी विधानसभा निवडणूक न लढवण्याचा निर्णय घेतला आहे.

गुरुवारी फुलंब्री येथे आयोजित करण्यात आलेल्या एका दीपावली मिलन कार्यक्रमात बोलतांना बागडे म्हणाले की,’सालडयाचे माझे दीड वर्ष शिल्लक राहिले आहेत, त्यानंतर मला सालगडी म्हणून राहयाचे नाही,’ असे म्हणत बागडे यांनी निवृत्तीचे संकेत दिले होते. तर याबाबत एका वृत्त वहिनीला बोलताना बागडे म्हणाले की, आगामी विधानसभा निवडणूक न लढण्याचा मी निर्णय घेतलेला आहे. मात्र हे माझे मत असून, पक्षाचे मत नाही. त्यामुळे पक्षाकडून जो आदेश येईल त्याप्रमाणे मी पुढील काम करेल असे बागडे म्हणाले.

पुढे बोलताना हरिभाऊ बागडे म्हणाले की, आगामी विधानसभा किंवा लोकसभा निवडणूक न लढण्याचा मी निर्णय घेतला आहे. मात्र सक्रीय राजकारणातून मी बाजूला जाणार नाही. ज्यांनी माझ्यासाठी कामे केली आहेत, त्यांच्यासाठी मला काम करायची आहे. त्यामुळे यापुढे मतदारसंघातील कार्यकर्ते, नागरिक यांच्यासाठी काम करणार असल्याचे त्यांनी म्हटले.

गेल्या काही दिवसांपासून फुलंब्री विधानसभा मतदारसंघातून निवडणूक लढवण्यासाठी भाजपमधून काहीजण इच्छुक आहेत. मात्र हरिभाऊ बागडे यांच्यामुळे त्यांना उमेदवारी मिळणे कठीण होते. गेल्यावेळी देखील बागडे यांचे वय पाहता त्यांना उमेदवारी मिळण्याबाबत अनेक चर्चा झाल्या होत्या. पण बागडे यांना पक्षाने उमेदवारी दिली होती. मात्र आता खुद्द हरिभाऊ बागडे यांनी स्वतःच विधानसभा निवडणूक न लढवण्याचा निर्णय घेतल्याने इच्छुकांद्म्ह्ये आनंदाचे वातावरण आहे. त्यामुळे आता यावर पक्षाची काय भूमिका असणार आहे, हे पाहणे  महत्वाचे असणार आहे.