पिंपरी – शहर परिसरातील दरवर्षी, उन्हाळ्याच्या दिवसांत होणाऱ्या गावजत्रा आणि त्यामधील कुस्त्यांच्या फडामध्ये करोनामुळे दोन वर्षांचा खंड पडला होता. यावर्षी करोनाचे सावट कमी झाल्याने तसेच गावोगावी पुन्हा जत्रांचे हंगाम सुरू झाल्यामुळे कुस्त्यांचे फड रंगण्यास सुरुवात झाली आहे.दोन वर्षे लहान-मोठ्या पैलवानांच्या खुराकाचीही अडचण झाली होती. यंदा फड पुन्हा रंगू लागल्याने पैलवानांची कमाई सुरु झाल्याचे चित्र पहावयास मिळत आहे.

पिंपरी चिंचवड शहर परिसरात दरवर्षी, विविध गावे आणि वाड्या-वस्त्यांवर ग्रामदैवतांच्या नावाने गावजत्रा भरतात. त्यानिमित्त, धार्मिक, सांस्कृतिक कार्यक्रम होत असतात. तसेच या बरोबरीने कुस्त्यांचे फडही रंगतात. साधारणपणे दरवर्षी डिसेंबर-जानेवारी महिन्यात आकुर्डी येथील गावजत्रेने हंगामाला सुरूवात होते. त्यानंतर, रहाटणी, काळेवाडी, दापोडी, पिंपळे गुरव, वाकड, चिखली, मोशी, चऱ्होली, दिघी, खराळवाडी, कासारवाडी, पिंपळे सौदागर, किवळे, पुनावळे, ताथवडे, थेरगाव, पिंपरीगाव आदी भागांत गावजत्रा होतात. यानिमित्ताने, कुस्त्यांची मैदाने भरतात. त्यामध्ये, स्थानिक आणि बाहेरचे अनेक लहान-मोठे पैलवान उतरून कुस्ती प्रेमींची मने जिंकतात. या फडात असलेल्या इनामी कुस्त्यांमधील रोख रकमेमुळे पैलवानांच्या वर्षभराच्या खुराकाची देखील सोय होते.

पैलवानांसाठी उत्पन्नाचे साधन हे केवळ कुस्ती असते. गेल्या दोन वर्षांत कुस्त्याच न झाल्यामुळे शहर परिसरातील अनेक पैलवानांना आर्थिक फटक बसला होता. जगण्याचीही अडचण झाल्याने कुस्तीप्रेमींसह पैलवानांना कुस्त्या सुरु होण्याचे वेध लागले होते. जत्रेचे हंगाम सुरू झाल्याने कुस्त्याही सुरू होऊ लागल्याने कुस्त्यांच्या माध्यमातून पैलवानांना उत्पन्न मिळविण्याचा मार्ग मोकळा झाला आहे. आता कुस्तीचे फड रंगु लागल्याने पैलवान मंडळींना मोठा दिलासा मिळाला आहे.

नामवंत मल्ल गाजवताहेत गावजत्रांचा फड
महाराष्ट्र केसरी विकी बनकर, विजय चौधरी, अभिजीत कटके, बाळा रफीक शेख, विष्णू खोसे , सचिन येलभर अशा अनेक दिग्गज पैलवानांनी देखील ठिकठिकाणच्या जत्रेच्या कुस्त्या गाजविल्या आहेत. शहरातील जत्रेतील कुस्त्यांमधून 50 ते 65 किलो वजन गटातील पैलवान चांगली कमाई करतात. तर, मोठे पैलवान त्यापेक्षा मोठ्या रक्कमेचे इनाम जिंकत असतात. केवळ उत्पन्नच नव्हे तर कुस्त्यांच्या माध्यमातून पैलवानांचा मान सन्मानदेखील केला जात असल्याने पैलवानांमध्ये तसेच कुस्तीप्रेमींमध्ये आनंदाचे वातावरण आहे.