रायपूर :- रायपूरमध्ये 11 ऑगस्ट रोजी विश्वविक्रम करण्याची तयारी सुरू आहे. एक असा विक्रम जो देशात, राज्यात आणि जगात अद्वितीय असेल. या विक्रमाची नोंद छत्तीसगडच्या इतिहासात कायमची केली जाईल.

स्वातंत्र्याच्या 75 व्या अमृत महोत्सवानिमित्त रायपूरच्या सायन्स कॉलेज मैदानावर एक लाखाहून अधिक लोक एकत्र देशाचे राष्ट्रीय गीत ‘वंदे मातरम्‌’ गाणार आहेत. या कार्यक्रमाला उपस्थित राहण्याचे आवाहन विविध क्षेत्रातील सेलिब्रिटींनी केले आहे.

आवाहन करणाऱ्यांमध्ये दिल्ली भाजपचे माजी प्रदेशाध्यक्ष आणि भोजपुरी सिनेमाचा सुपरस्टार मनोज तिवारी, भाजपचे रायपूर दक्षिणचे आमदार ब्रिजमोहन अग्रवाल, दुर्गचे खासदार विजय बघेल आणि जनता कॉंग्रेस छत्तीसगडचे प्रदेशाध्यक्ष अमित जोगी यांचा समावेश आहे. या कार्यक्रमासाठी देशभरातून सुमारे 8 हजार लोक रायपूरला येणार आहेत.

वंदे मातरम टीम, ओम मंडळीचे रोहित सिंग यांनी सांगितले की, ‘मेरी शान, वंदे मातरम’ कार्यक्रम 11 ऑगस्ट रोजी सायन्स कॉलेज मैदानावर सकाळी 8 वाजता आयोजित करण्यात आला आहे. यामध्ये सहभागी होण्यासाठी मध्य प्रदेश, पश्‍चिम बंगाल, आसाम, अरुणाचल प्रदेश, दक्षिण भारत, महाराष्ट्र, दिल्ली, यूपी, बिहार, कर्नाटक आदी राज्यांतील लोक रायपूरला पोहोचतील.

दुसरीकडे, छत्तीसगडच्या दुर्ग, राजनांदगाव, बालोदाबाजार, महासमुंद, अंबिकापूर आणि बस्तरसह अनेक जिल्ह्यातील लोक रायपूरला पोहोचतील.
या भव्य सोहळ्याच्या तयारीसाठी वंदे मातरम टीम रात्रंदिवस काम करत आहे.

कार्यक्रमाला भव्य स्वरूप देण्यासाठी टीम 3-4 महिन्यांपासून तयारी करत आहे. ही टीम सर्व लोकप्रतिनिधींची भेट घेऊन त्यांना कार्यक्रमात सहभागी होण्याचे निमंत्रण देत आहे. वंदे मातरम् टीममध्ये छत्तीसगड, दिल्लीसह अनेक राज्यांतील लोक निःस्वार्थपणे समाजहितासाठी सेवा देत आहेत.