पुणेः सध्या सायबर क्राईमचे गुन्हे वाढताना दिसत आहे. गेल्या काही दिवसांपूर्वी वर्षभरातील सायबर क्राईमच्या माध्यमातून आर्थिक फसवणूक केल्याची आकडेवारी पुणे पोलिसांनी जाहीर केली होती. तसेच या आकडेवारी सोबतच आर्थिक फसवणूक झालेल्या काही व्यक्तींना रक्कम परत मिळाल्याचेही नमूद करण्यात आले होते. अशा प्रकारचे आर्थिक फसणूक अॅानलाईन डेटिंग वेबसाईट, लग्न जमावण्याचे अनेक साईट्सवरून केली जाते. महिलांना लक्ष करून त्यांची मोठ्या प्रमाणात आर्थिक फसवणूक केली जाते. अशा प्रकारच्या एका फेक साईटवरून एकाने तब्बल २५ हून अधिक महिलांना आर्थिक गंडा घातल्याची धक्कादायक बाब समोर आली आहे.

मिळालेल्या माहितीनुसार, पुण्यातील लखोबा लोखंडे असे लग्नाचे आमिष दाखवून महिलांची आर्थिक फसवणूक करणाऱ्या आरोपीचे नाव आहे. या आरोपीला कोल्हापूर पोलिसांनी ताब्यात घेतले आहे. फिरोज शेख या नावाने तो महिलांशी संपर्क साधत होता. आरोपी हा लग्न जमवण्याच्या वेबसाईटवरून महिला आणि मुलींशी संपर्क साधत होता. कोल्हापूरातील फसवणूक झालेल्या एका महिलेच्या तक्रारीनंतर कोल्हापूर स्थाानिक गुन्हे अन्वेषण विभागाने त्याच्यावर कारवाई केली आहे. त्याला पोलिसांनी ताब्यात घेतल्यानंतर पोलीसी खाक्या दाखवताच आरोपीने २५ हून अधिक महिलांची लग्नाच्या आमिषाने फसवणूक केल्याची माहिती पोलिसांनी दिली.

ब्रेन ट्यूमर झाल्याचा दावा अन्…

कोल्हापूर येथील एका घटस्फोटित महिलेशी फिरोजने एका लग्न जमावण्याच्या साईटवरून संपर्क केला. आपण इंडस्ट्रीयल कॅान्ट्रॅक्टर आहोत, अशी थाप त्याने या पीडितेला मारली. तिचा आणि तिच्या कुटुंबाचा विश्वास संपादन केला. तरुणीशी शारीरीक संबंध देखील ठेवले. तिच्याकडून १ लाख ६९ हजार रुपये उकळले. तर ८ लाख २५ हजारांचे दागिने देखील घेतल्याचे पीडितेने दिलेल्या तक्रारीत म्हटले आहे. लग्नाचा विषय निघताच त्याने ब्रेन ट्यूमर झाल्याचा दावा केला. यानंतर पीडित तरुणीला आपली फसवणूक झाल्याचे लक्षात येताच तिने कोल्हापूर राजवाडा पोलीस ठाणे गाठत तक्रार दाखल केली. त्याच्याविरोधात आणखी काही गुन्हे दाखल असल्याची माहिती मिळत आहे.