डोर्लेवाडी : झारगडवाडी ( बारामती ) येथील जमीन गट नंबर ४६० मध्ये गेली साठ वर्षापासून राहत असलेल्या नागरिकांना रस्त्यापासून वंचित राहावे लागत आहे. सध्या हा रा. मा. १२० ते धुळदेव माणिक बोरकर या नावाने रस्ता जिल्हा परिषदच्या माध्यमातून मंजूर आहे. ६० वर्षांपासूनचा वहिवाटीचा घराकडे येणारा रस्ता शरद पवार गटाचा बारामती तालुका युवक अध्यक्ष प्रशांत बोरकर याने राजकीय द्वेषापोटी आणि मानसिक त्रास देण्याच्या हेतूने रस्ता अडवला आहे.

यामुळे आमच्या कुटुंबातील वयोवृद्ध महिला, पुरुष, लहान शाळकरी मुले यांना शासकीय मुलभूत घटकापासून वंचित रहावे लागत आहे. रस्ता होत नसल्याने आम्हाला मानसिक त्रास सहन करावा लागत आहे. याबाबत संबंधित विभागीय अधिकारी कानाडोळा करत आहेत. यामुळे येथील महिलांनी 8 मार्च या जागतिक महिलादिनी न्याय मिळावा यासाठी बारामती येथील प्रशासकीय भवनासमोर लाक्षणिक उपोषण करण्याचा निर्णय घेतला आहे. यामुळे आता संबंधित अधिकारी रस्ता अडवणाऱ्यावर नेमकी काय कारवाई करणार याकडे सर्वांचे लक्ष लागून राहिले आहे.

याबाबतचे निवेदन राज्याचे मुख्यमंत्री देवेंद्र फडणवीस उपमुख्यमंत्री अजित पवार, महसूलमंत्री चंद्रशेखर बावनकुळे, बारामतीचे उपविभागीय तथा दंडाधिकारी वैभव नावडकर, बारामतीचे तहसीलदार गणेश शिंदे, उपविभागीय पोलीस अधिकारी सुदर्शन राठोड, बारामती तालुका पोलीस निरीक्षक वैशाली पाटील, यांना देण्यात आले आहे. तसेच रस्ता अडवणाऱ्या संदर्भात सातत्याने उपमुख्यमंत्री अजित पवार तसेच खासदार सुप्रिया सुळे यांच्याकडे देखील पाठपुरावा केलेला आहे.

त्यांच्याकडून संबंधित अधिकाऱ्यांना मार्ग काढावा या सूचना वारंवार केल्या आहेत. मात्र, अधिकाऱ्याकडून ठोस कारवाई केली जात नाही. यामुळेच मी व अनेक महिला 8 मार्च या जागतिक महिला दिनी न्याय मिळावा म्हणून बारामती येथील प्रशासकीय भवनासमोर लाक्षणिक उपोषण करणार आहोत. त्यादिवशी रस्त्याबाबतचा मार्ग न निघल्यास याच ठिकाणी आमरण उपोषण सुरू करणार आहे याची संबंधित अधिकारी यांनी नोंद घ्यावी, असे उपोषणकर्त्या वनिता बोरकर यांनी सांगितले आहे.