CM yogi । शनिवारी संध्याकाळी उत्तर प्रदेशचे मुख्यमंत्री योगी आदित्यनाथ यांच्याबाबत मुंबई पोलिस नियंत्रण कक्षाला धमकीचा मेसेज आला होता. तेव्हापासून सुरक्षा यंत्रणा सतर्क आहेत. मुंबई पोलिसांनी धमकी देणाऱ्या महिलेची ओळख पटवली असून तिला अटक करून चौकशी सुरू केली आहे.

उत्तर प्रदेशचे मुख्यमंत्री योगी आदित्यनाथ यांना जीवे मारण्याची धमकी दिल्याप्रकरणी मुंबई पोलिसांनी २४ वर्षीय महिलेला अटक केल्याची माहिती एका अधिकाऱ्याने रविवारी दिली.

धमकी देणारी महिला कोण आहे?
फातिमा खान असे या महिलेचे नाव आहे. महिला सुशिक्षित असून तिने माहिती तंत्रज्ञान विषयात बीएससी केले आहे. फातिमा महाराष्ट्रातील ठाणे जिल्ह्यातील उल्हासनगर भागात कुटुंबासह राहते. अधिकाऱ्याने सांगितले की, तिचे वडील लाकूड व्यवसाय करतात. पोलिसांनी दिलेल्या माहितीनुसार, ही महिला सुशिक्षित असली तरी मानसिकदृष्ट्या अस्थिर आहे.

बाबा सिद्दीकीप्रमाणे जीवे मारण्याची धमकी
अधिकाऱ्याने सांगितले की, शनिवारी मुंबई वाहतूक पोलिसांच्या व्हॉट्सॲप नंबरवर एका अनोळखी नंबरवरून एक मेसेज आला होता, ज्यामध्ये योगी आदित्यनाथ यांना धमकी देण्यात आली होती की, जर आदित्यनाथ यांनी 10 दिवसांत मुख्यमंत्री पदाचा राजीनामा दिला नाही तर त्यांना फाशीची शिक्षा भोगावी लागेल. राष्ट्रवादीचे नेते बाबा सिद्दीकी यांची अशीच हत्या केली जाईल.

अधिकाऱ्याने सांगितले की, तपासादरम्यान पोलिसांना कळले की फातिमा खान नावाच्या महिलेने हा संदेश पाठवला होता. त्यानंतर मुंबई दहशतवादविरोधी पथकाने (एटीएस) उल्हासनगर पोलिसांसोबत संयुक्त कारवाई करत महिलेचा माग काढला आणि तिला पकडले. या प्रकरणाचा अधिक तपास सुरू असल्याचे अधिकाऱ्याने सांगितले.