पुणे : मार्केट यार्ड परिसरातील गंगाधाम चौकात ट्रकच्या धडकेत दुचाकीवरील दीपाली युगेंद्र सोनी (वय २९) यांचा मृत्यू झाला, तर त्यांचे सासरे जगदीश पन्नालाल सोनी (वय ६१) गंभीर जखमी झाले. या घटनेनंतर संतप्त नागरिकांनी वाहतूक पोलिसांवर रोष व्यक्त केला. गुरुवारी दुपारी पोलीस आयुक्त अमितेश कुमार यांनी घटनास्थळाची पाहणी करून सकाळी ६ ते रात्री १० या वेळेत जड वाहतुकीवर बंदीचे आदेश जारी केले. तसेच परिसरातील वाईन शॉप आणि परमिट रूमवर कारवाईचा बडगा उगारला. घटनास्थळी सहआयुक्त रंजन कुमार शर्मा, अपर पोलीस आयुक्त मनोज पाटील, उपायुक्त (वाहतूक) अमोल झेंडे आणि उपायुक्त राजकुमार शिंदे उपस्थित होते. ट्रकचालक शौकतअली पापलाल कुलकुंडी (वय ५१) याला अटक करण्यात आली आहे. जखमी जगदीश सोनी यांच्यावर खासगी रुग्णालयात उपचार सुरू आहेत. नागरिकांचा रोष, आयुक्तांचे आश्वासन: नागरिकांनी वाहतूक पोलिसांवर नाराजी व्यक्त करत, घटनेच्या वेळी पोलिस सोसायटीत आराम करत असल्याचा आरोप केला. तसेच जड वाहतुकीवरील बंदीचे फलक काढल्याचा आणि वाहतूक नियंत्रणाऐवजी पोलिस पावत्या फाडत असल्याचा मुद्दा उपस्थित केला. आयुक्तांनी संबंधित कर्मचाऱ्यांची चौकशी करून दोषींवर कारवाईचे आश्वासन दिले. तसेच महापालिकेला रस्ता रुंदीकरण, अतिक्रमण आणि बेकायदेशीर इमारतींवर कारवाईचे निर्देश देण्याचे सांगितले. कारवाई आणि उपाययोजना: आयुक्तांनी अवैध गोडाऊन सील करण्याची प्रक्रिया सुरू केली असून, इमारतींचे आराखडे सादर होईपर्यंत ती बंद राहतील. रात्रीच्या बांधकाम वाहतुकीबाबत पालिकेशी चर्चा होणार आहे. जड वाहतुकीच्या मार्गांवर हाईट बॅरिअर लावण्याचा निर्णयही घेण्यात आला. मार्केट यार्डातील जड वाहनांच्या वेळेबाबत अंतिम निर्णय लवकरच घेतला जाईल, असे आयुक्तांनी स्पष्ट केले.
