पुणे : अमावस्येच्या दिवशी रस्त्यावर दही, भात, नारळ ,लिंबू असा उतारा ठेवणाऱ्या महिलेवर सहकारनगर पोलीस ठाण्यात जादुटोणा प्रतिबंधक कायद्यानूसार गुन्हा दाखल करण्यात आला आहे. ही महिला मागील चार महिण्यापासून हे कृत्य करत होती.

याप्रकरणी धनकवडी येथील विद्यादीप गृह संस्था मर्यादीतच्या वतीने विवेक पाटील (६२) यांनी तक्रार दाखल केली आहे. मागील चर महिन्यांपासून अमावस्येच्या दिवशी रस्त्याच्या कडेला माजी महापौर दत्ता धनकवडे यांच्या बंगल्यासमोर हा उतारा/नैवैद्य ठेवला जात होता. येथे तीन रस्ते एकत्र येतात. या उताऱ्यामुळे लहान मुले आणि रहिवाशी भयभीत झाले होते. त्यांनी शनिवारच्या अमावस्येला लक्ष ठेऊन महिलेला रंगेहाथ पकडले.

यानंतर पोलिसांना पाचारण करुन तक्रार दाखल केली. महिलेची चौकशी केली असता, ती येथे मुलीकडे रहायला आली आहे. गावाला दर अमावस्येला अशा प्रकारे उतारा रस्त्यावर ठेवण्याची पध्दत आहे. यामुळे मी तो ठेवला असे तिचे म्हणणे आहे. याप्रकरणी वरिष्ठ पोलीस निरीक्षक राहुल गौड तपास करत आहेत.