Supriya Sule : गेल्या अनेक दिवसांपासून चर्चेत असलेल्या दोन्ही राष्ट्रवादी काँग्रेसच्या विलिनीकरणाच्या मुद्द्यावर अखेर खासदार सुप्रिया सुळे यांनी मोठं विधान केलं आहे. ‘विलिनीकरणाच्या चर्चांचा मला आता कंटाळा आला आहे. आज जे काही आहे ते प्रश्न विचारून टाका. आज काय ते होऊन जाऊ द्या. यापुढे मी विलिनीकरणावर बोलणार नाही,’ अशा स्पष्ट शब्दांत सुप्रिया सुळे यांनी आपली भूमिका मांडली.

तसेच राष्ट्रवादी काँग्रेस शरदचंद्र पवार पक्ष सत्तेत सहभागी होण्याचा प्रश्नच येत नसल्याचेही त्यांनी स्पष्ट केले. त्यामुळे दोन्ही राष्ट्रवादी एकत्र येण्याच्या चर्चांना आता पूर्णविराम मिळणार का, असा प्रश्न उपस्थित होत आहे.

गेल्या काही दिवसांपासून राष्ट्रवादी काँग्रेसच्या दोन्ही गटांच्या संभाव्य विलिनीकरणाबाबत राजकीय वर्तुळात जोरदार चर्चा सुरू होती. उपमुख्यमंत्री सुनेत्रा पवार बारामती दौऱ्यावर असताना त्यांनी ‘जशी वेळ येईल, तशा गोष्टी तुम्हाला कळतील,’ असे सूचक विधान केले होते. त्यांच्या या वक्तव्यानंतर विलिनीकरणाच्या चर्चांना आणखी वेग आला होता. मात्र, आता सुप्रिया सुळे यांनी पत्रकार परिषद घेऊन या चर्चांवर आपली भूमिका स्पष्ट केली आहे.

सुप्रिया सुळे म्हणाल्या की, “विलिनीकरणाच्या चर्चांचा आता मला कंटाळा आला आहे. माझा भाऊ अजित पवार हयात होता, तोपर्यंत विलिनीकरणाबाबत चर्चा सुरू होती. त्यासाठी तारीखही ठरली होती. मात्र, ज्या दिवशी माझा भाऊ गेला, त्याच दिवशी विलिनीकरणाच्या विषयाला माझ्या मनात आणि माझ्या पक्षात पूर्णविराम मिळाला.”

पुढे बोलताना त्यांनी सांगितले की, “संघटनेतील पदाधिकारी आणि अजितदादांसोबत विलिनीकरणाबाबत चर्चा झाली होती. त्याचे व्हिडीओदेखील माध्यमांनी दाखवले आहेत. मात्र, अजितदादा होते तोपर्यंतच या चर्चा सुरू होत्या. त्यांच्या निधनानंतर आमच्या बाजूने विलिनीकरणाबाबत कोणतेही विधान करण्यात आलेले नाही. अजित पवार गटाकडून जी काही वक्तव्ये करण्यात आली, त्यावरही आम्ही कोणतेही प्रतिउत्तर दिलेले नाही.” असे सुप्रिया सुळे यांनी स्पष्ट केले.

दरम्यान, दोन्ही राष्ट्रवादी काँग्रेस एकत्र आल्यास भविष्यात आपल्या राजकीय अस्तित्वाचा प्रश्न निर्माण होऊ शकतो, अशी भीती काही नेत्यांना असल्याची चर्चा राजकीय वर्तुळात आहे. त्यामुळे सध्याच्या घडीला दोन्ही पक्षांच्या विलिनीकरणाला काही नेत्यांचा विरोध असल्याचे बोलले जात आहे.

दुसरीकडे, विलिनीकरणाऐवजी स्वतंत्र गट म्हणून सत्तेत सहभागी होण्याचा पर्यायही चर्चेत असल्याची माहिती समोर येत आहे. एकीकडे विलिनीकरणाच्या चर्चांना पूर्णविराम देण्याचे संकेत सुप्रिया सुळे यांनी दिले आहेत, तर दुसरीकडे स्वतंत्र गट आणि सत्तेतील सहभागाबाबत तर्कवितर्क सुरू आहेत. त्यामुळे दोन्ही राष्ट्रवादी काँग्रेसच्या भविष्यातील राजकीय वाटचालीबाबत अवघ्या महाराष्ट्राचे लक्ष लागले आहे.

Diabetes Awareness: जगातील प्रत्येक 9 पैकी 1 व्यक्ती मधुमेहाच्या विळख्यात; महाराष्ट्रात किती टक्के रुग्ण?