Harshvardhan Sapkal : केंद्रीय निवडणूक आयोगाकडून ‘एसआयआर’ (SIR – Special Intensive Revision) मोहीम ३० जूनपासून महाराष्ट्रात सुरू होणार आहे. मतदार याद्या अचूक आणि पारदर्शक करण्यासाठी या मोहिमेअंतर्गत राज्यातील सुमारे ९ कोटी ८६ लाख मतदारांच्या नोंदींची घरोघरी जाऊन प्रत्यक्ष पडताळणी केली जाणार आहे. परंतु या मोहिमेबाबत काँग्रेसकडून चिंता व्यक्त करण्यात आली आहे.

महाराष्ट्रात सध्या सुरू असलेल्या मतदार यादी विशेष सखोल पुनरीक्षण मोहिमेचा दुसरा टप्पा किमान महिनाभर पुढे ढकलण्यात यावा, अशी आग्रही मागणी काँग्रेस पक्षाने केली आहे. यासंदर्भात काँग्रेसचे प्रदेशाध्यक्ष हर्षवर्धन सपकाळ यांनी राज्याचे मुख्य निवडणूक अधिकारी चोकलिंगम यांना अधिकृत पत्र पाठवले आहे.

राज्यातील वारकऱ्यांना मतदार यादीतून वगळण्याचा प्रयत्न होऊ नये, यासाठी राज्याचे मुख्य निवडणूक अधिकारी श्री. चोकलिंगम यांना पत्र पाठवून विशेष सखोल पुनरिक्षण (SIR) मोहिमेचा दुसरा टप्पा महिनाभर पुढे ढकलण्याची मागणी केली.

आषाढी वारीमध्ये लाखो वारकरी सहभागी होत असल्याने अनेक नागरिक… pic.twitter.com/Eg1N3D4VXw

— Harshwardhan Sapkal (@INCHarshsapkal) May 27, 2026

दरम्यान, निवडणूक आयोगाने १४ मे २०२६ रोजी मतदार यादी पुनरिक्षण एसआयआर SIR कार्यक्रम घोषित केला असून महाराष्ट्रात मॅपिंगचे काम अंदाजे ७२ टक्क्यापर्यंत झाले असल्याचे आयोगाने दिलेल्या माहितीवरून समजते.

दि. १९ जून २०२६ पर्यंत हे काम सुरु राहणार असून दुसरा टप्पा ३० जून ते २९ जुलै २०२६ या कालावधीत राबविला जाणार असल्याचे समजते, यासाठी बीएलओ घरोघरी जाऊन गणना प्रपत्र वाटप करून मतदारांकडून भरून घेतले जाणार आहे.

महाराष्ट्रात वारकरी संप्रदाय मोठ्या प्रमाणात असून या कालावधीत आषाढी वारी आहे. पश्चिम महाराष्ट्र, मराठवाडा, विदर्भातील जवळपास २० हून अधिक जिल्ह्यातील वारकरी या कालावधीत पंढरपूरला वेगवेगळ्या दिंड्यांमधून पायी जात असतात, ते घरी नसल्याने त्यांची नावे वगळली जाऊ शकतात, अशी भीती काँग्रेसकडून व्यक्त करण्यात आली आहे.

हर्षवर्धन सपकाळ यांनी पत्रात काय म्हटले?

काँग्रेसने पत्रात लिहिले की, महाराष्ट्राची सांस्कृतिक आणि धार्मिक परंपरा असलेली आषाढी वारी लवकरच सुरू होत आहे. या आषाढी वारीमध्ये राज्यभरातून लाखो वारकरी, शेतकरी आणि नागरिक मोठ्या संख्येने सहभागी होतात. वारीच्या कालावधीत हे लाखो नागरिक महिनाभर आपल्या गावाबाहेर आणि घराबाहेर असतात.

याच काळात जर निवडणूक आयोगाने मतदार यादी पुनरीक्षणाची (SIR) मोहीम राबवली आणि अधिकारी मतदारांच्या घरी गेले, तर अनेक नागरिक घरी उपलब्ध असणार नाहीत. अशा परिस्थितीत योग्य पडताळणी न होता हजारो प्रामाणिक मतदारांची नावे मतदार यादीतून वगळली जाण्याची मोठी भीती हर्षवर्धन सपकाळ यांनी व्यक्त केली आहे.

याशिवाय, जून आणि जुलै महिन्यात महाराष्ट्रात अनेक ठिकाणी अतिवृष्टी आणि मुसळधार पाऊस असतो. या आपत्तीच्या काळात नागरिकांचे प्रचंड हाल होतात आणि प्रशासकीय यंत्रणाही आपत्ती व्यवस्थापनात व्यस्त असते. Harshvardhan Sapkal

त्यामुळे पंढरपूर वारी आणि अतिवृष्टीचा हा संभाव्य कालावधी लक्षात घेता, निवडणूक आयोगाने ‘एसआयआर’चा दुसरा टप्पा महिनाभर पुढे ढकलावा, जेणेकरून एकही पात्र मतदार आपल्या हक्कापासून वंचित राहणार नाही. लोकशाहीतील प्रत्येक नागरिकाचा मतदानाचा अधिकारअबाधित राहावा, हीच काँग्रेस पक्षाची स्पष्ट भूमिका आहे, असे काँग्रेसने या पत्रात स्पष्ट केले आहे. Harshvardhan Sapkal

हेही वाचा: 

7/12 Utara Discontinued : सातबारा उतारे कायमचे बंद होणार! महापालिका अन् नगरपालिका हद्दीतील जागांसाठी राज्य सरकारचा मोठा निर्णय