Sanjay Raut : पुढील सहा महिन्यांत सरकार कोसळणार? बड्या नेत्याच्या दाव्याने खळबळ
Sanjay Raut : पुढील सहा महिन्यांत हे सरकार शेवटचा श्वास घेताना दिसेल, असा मोठा दावाही त्यांनी केला.
Sanjay Raut : “हे जनतेचं बंड आहे, सरकार ते थांबवू शकत नाही. या सरकारच्या अधःपतनाची सुरुवात झाली आहे. सरकारमध्ये राज्यकर्ते नाहीत, तर व्यापारी आहेत” अशा शब्दांत शिवसेना (उद्धव बाळासाहेब ठाकरे) पक्षाचे खासदार संजय राऊत यांनी केंद्र सरकारवर जोरदार टीका केली. तसेच पुढील सहा महिन्यांत हे सरकार शेवटचा श्वास घेताना दिसेल, असा मोठा दावाही त्यांनी केला.
दिल्लीतील आंदोलनाच्या पार्श्वभूमीवर राऊत यांच्या या वक्तव्याला विशेष महत्व प्राप्त झाले आहे. संजय राऊतांनी आंदोलनकर्त्यांना रोखण्याच्या कारवाईवर प्रश्न उपस्थित करत सरकारच्या कार्यपद्धतीवर टीका केली. जनतेच्या असंतोषाला केवळ दडपशाहीने रोखता येणार नाही, अशी भूमिका त्यांनी मांडली.
कॉकरोच जनता पार्टी (CJP) कडून मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी दिल्लीत आंदोलनाची हाक देण्यात आली आहे. या पार्श्वभूमीवर आंदोलकांना रोखण्यासाठी मोठ्या प्रमाणावर पोलीस आणि निमलष्करी दल तैनात करण्यात आल्याची माहिती समोर आली आहे.
Sanjay Raut
‘पुढील सहा महिन्यांत सरकारचा शेवटचा श्वास’
केंद्र सरकारच्या भवितव्याबाबत भाष्य करताना संजय राऊत यांनी सरकार फार काळ टिकणार नसल्याचा दावा केला. “हे सरकार टिकणार नाही. पुढील सहा महिन्यांत हे सरकार शेवटचा श्वास घेताना दिसेल,” असे ते म्हणाले. पुण्यातील पत्रकार परिषदेत संजय राऊत यांनी हा दावा केला.
संजय राऊत नेमकं काय म्हणाले?
संजय राऊत म्हणाले “देशात ज्या पद्धतीचे सध्याचे वातावरण आहे. तरुण रस्त्यावर उतरत आहे. त्यांच्या विरोधात पोलीस आणि सरकार ब्रिटिशांप्रमाणे अन्याय करत आहे. हे पाहता देशातील मोदी सरकार मार्च एप्रिल पर्यंत अखेरचा श्वास घेईल. त्यांचे सरकार पडण्याच्या हालचाली सुरू असल्याचा माझा अंदाज आहे. पर्यायी सरकार स्थापन होईल. हे व्यापाऱ्यांचे सरकार आहे. देशातील आंदोलनाकर्त्यांना सामोरे जाण्याची हिम्मत नाही. पोलीस प्रशासनाने बेकायदेशीर आदेश पाळू नयेत. ज्यांनी स्वातंत्र्याचा लढा अनुभवला नाही त्यांनी सरकार घालण्याच्या लढाईत सामील व्हावे.”
पोलिसांच्या कारवाईवरून आणीबाणीची आठवण
दिल्लीत आंदोलनकर्त्यांवर होत असलेल्या कारवाईबाबत बोलताना राऊत यांनी पोलिसांच्या भूमिकेवरही प्रश्न उपस्थित केले. “पोलिसांनी बेकायदा आदेश पाळू नयेत, असे म्हणणे विरोधात मानले जाईल; पण आणीबाणीच्या काळात अशा प्रकारची विधाने भारतीय जनता पक्षाच्या नेत्यांनीही केली होती,” असे म्हणत भारतीय जनता पार्टीवर टीका केली.
दरम्यान, दिल्लीतील आंदोलन, आंदोलकांना ताब्यात घेण्याची कारवाई आणि मुख्य निवडणूक आयुक्तांच्या राजीनाम्याची मागणी यामुळे राजकीय वातावरण तापले आहे. या मुद्द्यांवरून केंद्र सरकार आणि विरोधकांमधील संघर्ष आणखी तीव्र होण्याची शक्यता आहे.
