मुंबई : महाराष्ट्रातील मतदारयादीतील बोगस आणि डुप्लिकेट मतदारांच्या मुद्द्यावर ठाकरे बंधू आक्रमक झाले आहेत. शिवसेना (युबीटी) नेते उद्धव ठाकरे आणि मनसे प्रमुख राज ठाकरे यांनी निवडणूक आयोगाविरोधात कायदेशीर लढाई लढण्याचा इशारा दिला असून, येत्या दोन दिवसांत कोर्टात याचिका दाखल करण्याची शक्यता आहे. मात्र, उद्धव ठाकरे यांनी स्पष्ट केले की, ही लढाई सत्तेत आल्यावरच होईल. दुसरीकडे, १ नोव्हेंबरला विरोधकांचा संयुक्त मोर्चा निश्चित झाला असून, स्थानिक निवडणुकांवर बहिष्कार टाकण्याच्या विचारातही ते आहेत. काँग्रेसचा या बहिष्काराला विरोध असल्याने ठाकरे गटबाहेरील नव्या पर्यायांवरही चर्चा सुरू आहे. वरळी मतदारसंघातील १६,०४३ बोगस मतदारांचा पर्दाफाश आदित्य ठाकरे यांनी केला असून, मनसेने जोगेश्वरी, नवी मुंबईतील पाम बीच, सार्वजनिक शौचालये आणि आयुक्त निवासासारख्या पत्त्यांवर नोंदलेल्या मतदारांची शोधमोहीम हाती घेतली आहे. राज ठाकरे यांनी ९६ लाख बोगस मतदारांचा आरोप करत आयोगाला मतदारयादी स्वच्छ करण्याची वेळ देण्याची मागणी केली आहे. मुंबई, ठाणे, पुणे आणि नाशिकमध्ये प्रत्येकी ८ ते १० लाख बोगस नावे असल्याचा दावा त्यांनी केला. राहुल गांधी यांनी बंगळुरूतील महादेवपुरा मतदारसंघातील व्होटचोरीचा मुद्दा उपस्थित केल्यानंतर राज ठाकरेंनीही असाच संशय व्यक्त केला होता. कायदेशीर लढाईची तयारी उद्धव ठाकरे यांनी २७ ऑक्टोबरला वरळीतील ‘निर्धार मेळाव्यात’ सांगितले की, “आयोगाने स्थानिक निवडणुकांमध्ये व्हीव्हीपॅट वापरण्याचा निर्णय रद्द केला आहे. बोगस मतदार मतदान करून निघून जातील आणि आयोगाने जसे हवे तसे निकाल जाहीर करतील. आम्ही काही केले तर आमच्यावर कायदा आणला जाईल? तर मी म्हणतो, निवडणूक आयुक्तांविरोधातही खटला दाखल करावा आणि त्यांना शिक्षा झाली पाहिजे.” त्यांनी पक्ष नेत्यांना आयोगाविरोधात खटला दाखल करण्याची मुभा दिली असून, केंद्रात इंडिया गठबंधन सत्तेत आल्यावर कारवाई होईल, असे सांगितले. ठाकरे बंधूंच्या नेते कायदेतज्ज्ञांशी सल्लामसलत करत असून, पुराव्यासह कोर्टात घोळ सादर करण्याची तयारी आहे. राज ठाकरे यांनीही १९ ऑक्टोबरला मुंबईतल्या रॅलीत आयोगाला आव्हान दिले की, मतदारयादी स्वच्छ न झाल्याशिवाय निवडणुका घेऊ नका.
