Satara: जिल्हा परिषद अध्यक्षांना प्रशासकीय कर्तव्यांचा विसर पडला आहे. आरफळ ग्रामपंचायत सदस्याच्या कथित गैरहजेरीप्रकरणी कारवाईचा निर्णय घेण्यास जाणीवपूर्वक विलंब केला जात आहे. यावर दि. 16 नोव्हेंबरपर्यंत निर्णय न घेतल्यास दि.17 नोव्हेंबर रोजी अध्यक्षांना धोत्र्याचे फूल देऊन त्यांच्या दालनासमोर आत्मक्लेश आंदोलन करणार असल्याचा इशारा सामाजिक कार्यकर्ते सुशांत मोरे यांनी दिला आहे.

जिल्हा मध्यवर्ती बँक, पदवीधर आणि शिक्षक मतदारसंघांच्या निवडणुकांच्या राजकीय घडामोडींमध्ये जिल्हा परिषद अध्यक्षा जास्त व्यस्त असल्याचे सांगत सुशांत मोरे यांनी त्यांच्या कार्यपद्धतीवरच प्रश्नचिन्ह उपस्थित केला आहे.

जिल्हा परिषदेच्या सर्वोच्च पदावर विराजमान असताना राजकीय कार्यक्रमांपेक्षा प्रशासकीय जबाबदार्‍यांना प्राधान्य देणे अपेक्षित आहे. आरफळ ग्रामपंचायत सदस्य अजय रामचंद्र पवार सलग 8 मासिक सभांना गैरहजेर होते. याप्रकरणी दि. 28 सप्टेंबर रोजी पुराव्यानिशी तक्रार देऊनही अद्यापही कारवाई होत नसल्याने अध्यक्षांना आपल्या पदाच्या कर्तव्याचा विसर पडला की कायदेशीर ज्ञान कमी, असा सवाल सुशांत मोरे यांनी उपस्थित केला.

समन्वयाने निर्णय घ्यावा…

सामाजिक कार्यकर्ते सुशांत मोरे यांना माहिती अधिकारातून मिळालेल्या माहितीनुसार, आरफळ ग्रामपंचायतीचे सदस्य अजय रामचंद्र पवार डिसेंबर 2025 ते ऑगस्ट 2026 या कालावधीत सलग 8 महिने मासिक सभांना पूर्णवेळ गैरहजर राहिल्याचा दावा आहे. सभांची नोटीस स्वीकारूनही ते सभांना उपस्थित राहिले नसल्याचे मोरे यांचे तक्रारीसोबत आवश्यक कागदपत्रे आणि पुराव्यांसह दि. 28 सप्टेंबर रोजी जिल्हा परिषदेकडे लेखी तक्रार दाखल करून कारवाईची मागणी करण्यात आली.

जिल्हा परिषद अध्यक्षांनी पंचायत विभागातील अधिकार्‍यांकडून योग्य कायदेशीर सल्ला घेऊन प्रकरणाचा निपटारा करणे अपेक्षित आहे. स्थायी समितीचे सचिव असलेल्या उपमुख्य कार्यकारी अधिकारी (पंचायत) यांच्यासह संबंधित अधिकार्‍यांनी कायद्यातील तरतुदी तपासून कार्यवाही करावी. ही कारवाई होत नसल्याने अध्यक्षांच्या कार्यक्षमतेवरही सुशांत मोरे यांनी प्रश्न उपस्थित केले आहेत. आरफळ ग्रामपंचायत सदस्य अजय पवार यांच्या प्रकरणात जिल्हा परिषद अध्यक्ष, उपमुख्य कार्यकारी अधिकारी (पंचायत )आणि सातारचे गटविकास अधिकार्‍यांनी समन्वयाने निर्णय घ्यावा, असेही त्यांनी निवेदनात म्हटले आहे.