Operation Sindoor: भारतीय सैन्याने ‘ऑपरेशन सिंदूर’ अंतर्गत 6-7 मे च्या मध्यरात्री पाकिस्तान आणि पाकिस्तान प्रशासित कश्मीरमधील (पीओके) 9 दहशतवादी तळांवर अचूक मिसाईल हल्ले करत पहलगाम हल्ल्याचा बदला घेतला. या कारवाईत 90 दहशतवादी ठार झाले, तर जैश-ए-मोहम्मद आणि लश्कर-ए-तैयबाच्या तळांचा नायनाट झाला. या हल्ल्यांमुळे पाकिस्तानात खळबळ उडाली असून, पाकिस्तान भारतावर प्रत्युत्तरादाखल हल्ला करेल का, याबाबत चिंता वाढली आहे.

पाकिस्तानच्या लष्कराने दावा केला की, भारताच्या हल्ल्यात 26 नागरिक ठार आणि 46 जखमी झाले. पाकिस्तानी पंतप्रधान शहबाज शरीफ यांनी या हल्ल्याला “युद्धाची कृती” ठरवत “जोरदार प्रत्युत्तर” देण्याची धमकी दिली आहे. पाकिस्तानने नियंत्रण रेषेवर (एलओसी) भारी गोळीबार सुरू केला असून, पंजाब प्रांतात आणीबाणी लागू केली आहे. तसेच, त्यांनी पाच भारतीय विमाने पाडल्याचा दावा केला, ज्याला भारताने अद्याप प्रतिसाद दिलेला नाही.

भारताने मात्र ही कारवाई केवळ दहशतवादी तळांपुरती मर्यादित असल्याचं स्पष्ट केलं आहे. गृह मंत्रालयाने आंतरराष्ट्रीय सीमेवर हाय अलर्ट जारी करत अर्धसैनिक दलांच्या सुट्ट्या रद्द केल्या आहेत. राष्ट्रीय सुरक्षा सल्लागार अजित डोवाल यांनी अमेरिका, ब्रिटन, सौदी अरेबियासह अनेक देशांशी चर्चा केली असून, भारताच्या कारवाईला पाठिंबा मिळत आहे.

पाकिस्तानच्या आर्थिक अस्थिरतेमुळे आणि आंतरराष्ट्रीय दबावामुळे त्यांचा प्रत्युत्तराचा निर्णय अवघड आहे. तज्ज्ञांच्या मते, पाकिस्तान लष्करी हल्ल्याऐवजी छुप्या दहशतवादी कारवायांचा मार्ग निवडू शकतो. संयुक्त राष्ट्रांचे सरचिटणीस अँटोनियो गुटेरेस यांनी दोन्ही देशांना संयम राखण्याचं आवाहन केलं आहे. भारताने आपली तयारी पूर्ण ठेवली असून, कोणत्याही आव्हानाला सामोरं जाण्यास सज्ज आहे. सीमेवर तणाव कायम असला, तरी युद्ध टाळण्यासाठी राजनैतिक चर्चेची गरज आहे.