मुंबई : केंद्र सरकारच्या नव्या कृषी कायद्यांविरोधात दिल्लीच्या मागच्या ९० दिवसांपेक्षा जास्त काळ शेतकरी आंदोलन सुरू आहे. परंतु अजूनही यावरून तोडगा निघाला नाही. याच पार्श्वभूमीवर संयुक्त किसान मोर्चाने आज देशभर चक्का जाम आंदोलनाची हाक देण्यात आली आहे. या चक्का जाम आंदोलनाला काँग्रेस, राष्ट्रवादी काँग्रेससह शिवसेनेने पाठिंबा दिला आहे. यावरून भाजपाचे नेते आशिष शेलार यांनी काँग्रेससह शिवसेनेवर निशाणा साधला आहे.

आशिष शेलार यांनी यासंदर्भात ट्विट केले आहे. यामध्ये शेतकरी आंदोलनाला पाठिंबा दर्शविणाऱ्या रिहाना, ग्रेटा थॅनबर्ग, मिया खलिफा यांची काँग्रेस-शिवसेनेने बाजू घेतल्याचा आरोप करत आशिष शेलार यांनी हल्लाबोल केला आहे. “देशांतर्गत विषयात उगाच ढवळाढवळ करणाऱ्या रिहाना, ग्रेटा थॅनबर्ग, मिया खलिफा या परदेशींच्या तालावर काँग्रेस-शिवसेनेने ‘पॉप डान्स’ केला. तर या परदेशींना सचिन तेंडुलकर, लतादीदींनी खडसावले, अण्णा हजारेंनी लोकशाहीचा सन्मान केला तर त्यांच्या विरोधात हेच धिंगाणा घालतात,” असे ट्विट आशिष शेलार यांनी केले आहे.

देशांतर्गत विषयात उगाच ढवळाढवळ करणाऱ्या रिहाना, ग्रेटा थॅनबर्ग, मिया खलिफा या परदेशींच्या तालावर काँग्रेस-शिवसेनेने "पॉप डान्स" केला.

तर या परदेशींना सचिन तेंडुलकर, लतादीदींनी खडसावले, अण्णा हजारेंनी लोकशाहीचा सन्मान केला तर त्यांच्या विरोधात हेच धिंगाणा घालतात.
1/2

— Adv. Ashish Shelar – ॲड. आशिष शेलार (@ShelarAshish) February 6, 2021

याचबरोबर, दुसऱ्या ट्विटमध्ये आशिष शेलार यांनी सत्तेसाठी महाराष्ट्र धर्मावर ‘ट्रॅक्टर’ फिरवणार का? असा सवाल करत शिवसेनेवर टीका केली आहे. “वंदनीय शिवसेनाप्रमुख बाळासाहेब ठाकरे यांनी ज्यांचा प्रचंड सन्मान केला. त्या भारतरत्न, महाराष्ट्र भूषण व्यक्तींवर शिवसेना शिंतोडे उडवून महाराष्ट्र द्रोह का करतेय? काँग्रेस सोबत जाऊन शिवसेनेच्या बुद्धीचा ‘चक्काजाम’ झालाय ? सत्तेसाठी महाराष्ट्र धर्मावर ‘ट्रॅक्टर’ फिरवणार का?”, असे ट्विट आशिष शेलार यांनी केले आहे.

वंदनीय शिवसेनाप्रमुख बाळासाहेब ठाकरे यांनी ज्यांचा प्रचंड सन्मान केला त्या भारतरत्न, महाराष्ट्र भूषण व्यक्तींवर शिवसेना शिंतोडे उडवून महाराष्ट्र द्रोह का करतेय?
काँग्रेस सोबत जाऊन शिवसेनेच्या बुद्धीचा "चक्काजाम" झालाय ?
सत्तेसाठी महाराष्ट्र धर्मावर "ट्रॅक्टर" फिरवणार का?
2/2

— Adv. Ashish Shelar – ॲड. आशिष शेलार (@ShelarAshish) February 6, 2021

दरम्यान, दिल्ली सीमेवरील शेतकरी आंदोलनाचे इंटरनॅशनल पॉप स्टार रिहाना, पर्यावरणवादी ग्रेटा थनबर्ग आणि पॉर्न स्टार मिया खलिफाने समर्थन देत ट्विट केले. मात्र, यानंतर सोशल मीडियावर एकच गोंधळ निर्माण झाला आहे. हा विषय जागतिक सेलिब्रिटींनी उपस्थित केल्यानंतर आता देशातील काही सेलिब्रिटींचा याला विरोध होत आहे.