Laxman Hake : बारामती विधानसभा पोटनिवडणुकीसाठी 23 एप्रिलला उमेदवारी अर्ज दाखल करण्याचा शेवटचा दिवस असून, सुनेत्रा पवार यांच्याविरोधात 19 जणांनी उमेदवारी अर्ज दाखल केले आहेत. यामध्ये बिग बॅास फेम अभिजित बिचकुले यांचाही अर्ज आहे. अजित पवार यांच्या विमान अपघाती निधनानंतर बारामती विधानसभेच्या रिक्त झालेल्या जागेसाठी पोटनिवडणूक होत आहे. ही निवडणूक बिनविरोध करण्यासाठी महायुतीकडून प्रयत्न सुरू आहेत. त्यामुळे राजकीय घडामोडींनी वेग घेतला असून, अजून काही जण उमेदवारी अर्ज दाखल करु शकतात. काँग्रेसकडून चाचपणी करण्यात आली असून उमेदवार दिला जाऊ शकतो. ओबीसी नेते लक्ष्मण हाके बारामतीची पोटनिवडणूक लढणार असल्याचे त्यांनी जाहीर केले आहे. मात्र, ते अपक्ष लढणार की कोणत्या राजकीय पक्षाकडून लढणार हे अद्याप समोर आलेले नाही. मात्र, माध्यमांशी बोलताना लक्ष्मण हाकेंनी एक सूचक वक्तव्य केले आहे. मी सोमवारी अर्ज भरणार असून राष्ट्रीय पक्ष माझ्या संपर्कात असल्याचे लक्ष्मण हाके म्हणाले आहेत. त्यामुळे नेमका कोणता राष्ट्रीय पक्ष त्यांच्या संपर्कात आहे यावर विविध तर्क वितर्क बांधले जात आहेत. सोमवारी नाट्यमय घडामोडी घडू शकतात 6 एप्रिल हा दिवस उमेदवारी अर्ज दाखल करण्याचा शेवटचा दिवस असल्याने नाट्यमय घडामोडी घडू शकतात, असा अंदाज आहे. या दिवशी राष्ट्रवादी काँग्रेसकडून सुनेत्रा पवार उमेदवारी अर्ज दाखल करणार आहेत. यावेळी सुनेत्रा पवार यांच्यासमेवत पक्षातील महत्वाचे नेते उपस्थित राहणार असल्याची माहिती आहे. ओबीसी नेते लक्ष्मण हाके हे देखील सोमवारी उमेदवारी अर्ज दाखल करणार आहेत. याशिवाय काँग्रेसकडून उमेदवार दिला जाऊ शकतो अशी चर्चा आहे. त्यामुळे काँग्रेस माघार घेणार की उमेदवार देणार हे पाहायला मिळेल. एकूणच सोमवार 6 एप्रिल हा दिवस अत्यंत महत्वाचा ठरणार आहे. हेही वाचा : Chikhali News : “पतिव्रता असल्याचे दाखवण्यासाठी महिला मोठं कुंकू अन्…”; काँग्रेसच्या माजी आमदाराचे वादग्रस्त वक्तव्य
