Eknath Shinde has called a meeting of ministers : सध्या राज्यात वेगवान घडामोडींना वेग आल्याची जोरदार चर्चा रंगली आहे. नुकतीच राष्ट्रवादी काँग्रेस पक्षाचे प्रदेशाध्यक्ष सुनील तटकरे तसेच शरद पवार गटाच्या खासदार सुप्रिया सुळे यांनी दिल्लीत जाऊन केंद्रीय मंत्री अमित शाह यांची भेट घेतल्याने चर्चांना उधाण आले आहे.

या दोन्ही नेत्यांच्या या भेटीची राज्यभरात जोरदार चर्चा आहे. आज राज्य मंत्रिमंडळाची बैठक पार पडणार असून या बैठकीनंतर राज्याचे उपमुख्यमंत्री आणि शिवसेना पक्षाचे मुख्य नेते एकनाथ शिंदे शिवसेनेच्या सर्व मंत्र्यांची बैठक घेणार असल्याची माहिती समोर आली आहे. या बैठकीत एकनाथ शिंदे कोणता मोठा निर्णय घेणार का हे पाहणे महत्वाचे असणार आहे.

नीट पेपरफुटीप्रकरणानंतर सीजेपीने मोठे जनआंदोलन उभे केले होते. या आंदोलनातील तरुणांचा सहभाग लक्ष्यणीय होता. आंदोलनकर्त्यांनी केंद्रीय शिक्षणमंत्री धर्मेंद्र प्रधान यांनी राजीनामा द्यावी ही प्रमुख मागणी केली होती. अखेर सरकारला कठोर निर्णय घेत धर्मेंद्र प्रधान यांचा राजीनामा घेणे भाग पडले.

या आंदोलनानंतर आता कॅाक्रोच जनता पार्टीचं पुढचं पाऊल काय असणार याविषयी विविध चर्चा सुरू आहेत. अशातच राज्यात देखील टीईटी पेपरफुटीप्रकरणी सरकार कोंडीत सापडण्याची चर्चा आहे. या सगळ्या पार्श्वभीवर राज्यातील राजकीय वातावरण तापलं आहे.

बैठकीकडे राजकीय वर्तुळाचे लक्ष 

MPSC द्वारे घेण्यात आलेल्या एका परीक्षेचा पेपर फुटल्याचा आरोप शरद पवार गटाचे आमदार रोहित पवार यांनी केला आहे. त्यांनी पत्रकार परिषद घेत याविषयी गंभीर आरोप करत सरकारला घेरण्याचा प्रयत्न केला असल्याचे बोलले जात आहे. तर टीईटी पेपरफुटी प्रकरणावरुन काँग्रेसमधील नेत्याने थेट शिक्षणमंत्री दादा भुसे यांच्या राजीनाम्याची मागणी केली आहे. या सगळ्या पार्श्वभूमीवर एकनाथ शिंदे यांच्या राज्य मंत्रिमंडळानंतर होणाऱ्या मंत्र्यांच्या बैठकीत काय होणार याकडे राजकीय वर्तुळाचे लक्ष लागले आहे.

गेल्या दीड वर्षातील कामकाजाचा सविस्तर आढावा

मिळालेल्या माहितीनुसार, राज्य मंत्रिमंडळाच्या बैठकीनंतर उपमुख्यमंत्री एकनाथ शिंदे यांनी शिवसेनेच्या सर्व मंत्र्यांची महत्त्वाची बैठक बोलावली आहे. या बैठकीत प्रत्येक मंत्र्यांच्या विभागाचा गेल्या दीड वर्षातील कामकाजाचा सविस्तर आढावा घेतला जाणार आहे. सूत्रांच्या माहितीनुसार, मंत्र्यांनी घेतलेल्या महत्त्वाच्या निर्णयांची केवळ माहितीच नव्हे, तर त्या निर्णयांची प्रत्यक्ष अंमलबजावणी कितपत झाली, याचीही तपासणी शिंदे करणार असल्याचे सांगण्यात आले आहे.

एकनाथ शिंदे कठोर निर्णय घेणार?

अनेक आमदारांनी मतदारसंघातील कामे संबंधित विभागांकडून होत नसल्याच्या तक्रारी शिंदे यांच्याकडे केल्याची चर्चा आहे. त्यानंतरच ही आढावा बैठक बोलावण्यात आल्याचे सूत्रांचे म्हणणे आहे. दरम्यान, शिवसेनेच्या मंत्रिमंडळात फेरबदल होण्याची चर्चा सुरू असतानाच या बैठकीला विशेष महत्त्व प्राप्त झाले आहे. मंत्र्यांच्या कामगिरीनंतर एकनाथ शिंदे कठोर निर्णय घेण्याची शक्यता वर्तवली जात आहे.

Pune Metro: मेट्रो राजगुरुनगर-पानमळापर्यंत धावणार; महामेट्रोच्या डीपीआर बैठकीत काय घडलं?