नवी दिल्ली  – भारतीय जनता पक्षात (भाजप) पुढील राष्ट्रीय अध्यक्षपदाच्या निवडणुकीबाबत राजकीय वर्तुळात जोरदार चर्चा सुरू आहे. सद्यस्थितीत अध्यक्ष जे.पी. नड्डा यांचा कार्यकाळ आधीच वाढवण्यात आला असून, आता पक्षांतर्गत प्रश्न उपस्थित होत आहेत की, हा महत्त्वाचा निर्णय कधी घेतला जाईल आणि या पदावर कोण बसणार? दुसरीकडे, बिहार विधानसभा निवडणुकीनंतरच नवीन अध्यक्षाची निवड होण्याची शक्यता व्यक्त केली जात आहे. यापूर्वी पक्षाकडून बिहार निवडणुकीपूर्वीच नवीन अध्यक्ष जाहीर होईल, असे संकेत देण्यात आले होते; मात्र आता ते शक्य वाटत नाही.

वास्तविक, निवडणूक आयोगाची टीम सध्या बिहारमध्ये असून, येत्या आठवड्यात निवडणुकीची घोषणा होण्याची अपेक्षा आहे. अशा परिस्थितीत या मुद्द्यावर तात्काळ निर्णय घेणे कठीण झाले आहे. भारत निवडणूक आयोगाने सोशल मीडिया प्लॅटफॉर्म ‘एक्स’वर पोस्ट करून सांगितले की, बिहार विधानसभा निवडणुकीच्या तयारीच्या आढाव्यासाठी मुख्य निवडणूक आयुक्त ज्ञानेश कुमार यांच्या नेतृत्वाखाली निवडणूक आयुक्त डॉ. सुखबीर सिंह संधू आणि डॉ. विवेक जोशी यांच्यासह आयोगाचे प्रतिनिधीमंडल शुक्रवारपासून पटण्यात पोहोचले आहे.

यापूर्वीच, निवडणूक आयोगाने बिहार विधानसभा निवडणूक आणि काही राज्यांतील उपनिवडणुकीसाठी सामान्य, पोलिस आणि खर्च पर्यवेक्षक म्हणून नियुक्त करण्यात येणाऱ्या अधिकाऱ्यांसाठी ब्रिफिंग आयोजित केली होती. या बैठकीत २८७ आयएएस अधिकारी, ५८ आयपीएस अधिकारी आणि आयआरएस, आयआरएएस, आयसीएएस तसेच इतर सेवांतील ८० अधिकाऱ्यांसह एकूण ४२५ अधिकाऱ्यांनी सहभाग घेतला. ही ब्रिफिंग नवी दिल्लीतील आयआयआयडीईएम येथे पार पडली. या आठवड्यात बिहार विधानसभा निवडणुकांची घोषणा होण्याची शक्यता आहे.

जानेवारी २०२० पासून नड्डा अध्यक्ष –

भाजपमध्ये सध्या अध्यक्षपदाबाबत मोठी हालचाल आहे. सद्यस्थितीत राष्ट्रीय अध्यक्ष जे.पी. नड्डा यांचा कार्यकाळ आधीच वाढवण्यात आला आहे. ते जानेवारी २०२० पासून या पदावर कार्यरत आहेत. २०२४ च्या लोकसभा निवडणुकीपूर्वी त्यांचा कार्यकाळ वाढवण्यात आला होता, ज्यामुळे पक्षांतर्गत अनेक प्रश्न उपस्थित झाले होते. आता पुन्हा एकदा हा मुद्दा गाजू लागला असून, पक्ष कधी नवीन अध्यक्ष निवडणार आणि या महत्त्वाच्या पदावर कोणाला संधी मिळेल, याबाबत उत्सुकता आहे. हा निर्णय पक्षाच्या भविष्याच्या दिशेला आकार देणारा ठरेल. राजकीय वर्तुळात अनेक मोठ्या नेत्यांची नावे फिरत आहेत. प्रत्येकजण जाणून घेण्याच्या मागे लागला आहे की, पुढील अध्यक्ष कोण? हे पद भाजपमध्ये अतिशय प्रभावी मानले जाते, त्यामुळे सर्वांचीच नजर याच्यावर खिळली आहे.