Sanjeeda Shaikh : सध्या दक्षिणेचा सुपरस्टार यशचा बहुप्रतिक्षित आगामी चित्रपट ‘टॉक्सिक’ची जोरदार चर्चा आहे. नुकताच या चित्रपटाचा दुसरा टीझर प्रदर्शित झाला असून, टीझर पाहून चाहत्यांची उत्सुकता शिगेला पोहचली आहे. १९ मार्च २०२६ रोजी हा चित्रपट प्रेक्षकांच्या भेटीला येणार आहे. या चित्रपटाच्या निमित्ताने पुन्हा एकदा मोठ्या पडद्यावर यशची डॅशिंग स्टाइल चाहत्यांना पाहायला मिळणार आहे. चित्रपटाचा टीझर पाहिल्यानंतर मोठ्या स्केलवर चित्रपटाची निर्मिती करण्यात आल्याचे दिसते. त्यामुळे कथेचा प्लॅाट नेमका काय असणार याबाबत मोठी उत्सुकता असणार आहे. दोन्ही टीझर रिलीज झाल्यानंतर चित्रपटाला घेऊन बऱ्याच चर्चा रंगल्या असून, यशसोबत तब्बल पाच अभिनेत्री स्क्रिन शेअर करणार आहेत. नयनतारा, कियारा अडवाणी, हुमा कुरेशी, रुक्मिणी वसंत आणि तारा सुतारिया या पाच अभिनेत्री महत्त्वाच्या भूमिकेत आहेत. आता नवीन माहितीनुसार, आणखी एका अभिनेत्रीची एंन्ट्री टॅाक्सिकमध्ये होणार असल्याची जोरदार चर्चा होत आहे. संजीदा शेख असे नवीन अभिनेत्रीचे नाव आहे. मीडिया रिपोर्टनुसार, टीव्ही अभिनेत्री संजीदा शेख यशच्या टॉक्सिक चित्रपटात एका खास भूमिकेत झळकणार आहे. संजीदा शेख ही टीव्ही इंडस्ट्रीतील एक टॉप-टॅलेंटेड अभिनेत्री आहे. तिने अनेक चित्रपटांमध्ये काम केले आहे. संजीदा शेख ‘फायटर’ आणि ‘हीरामंडी: द डायमंड बाजार’मध्ये लक्ष वेधक भूमिका साकारताना दिसली होती. त्यामुळे आता तिला टॉक्सिकमध्ये पाहणे तिच्या चाहत्यांसाठी एक मोठी पर्वणीच असणार आहे. संजीदा शेख ‘धमाल ४’ आणि सनी देओलच्या ‘इक्का’ चित्रपटात दिसणार आहे. ‘केजीएफ २’ च्या यशानंतर मोठ्या ब्रेकनंतर यश ‘टॉक्सिक’ चित्रपटातून प्रेक्षकांच्या भेटीला येणार आहे. या चित्रपटाचे दोन टीझर रिलीज झाले आहेत, जे चाहत्यांना खूपच आवडले आहेत. विशेष म्हणजे यशच्या ‘टॉक्सिक’ आणि रणवीर सिंगचा ‘धुरंधर २’ एकाच दिवशी रिलीज होणार असल्याची चर्चा आहे. त्यामुळे दोन्ही चित्रपटांची टक्कर पाहण्यासाठी चाहते उत्सुक आहेत. ‘टॉक्सिक’चे दिग्दर्शन गीतू मोहनदास यांनी केले आहे. हेही वाचा : Pune Crime News : चोरी करणाऱ्या सराईत आरोपींना अटक; दोन गुन्ह्यांची उकल
