Sumona Chakravarti: लोकप्रिय अभिनेत्री सुमोना चक्रवर्तीने गेल्या काही महिन्यांपासून मनोरंजनविश्व आणि सोशल मीडियापासून अचानक अंतर का ठेवले होते, याचा खुलासा अखेर तिने स्वतः केला आहे. ‘कॉमेडी नाइट्स विथ कपिल’ या कार्यक्रमातील कपिल शर्माची ऑनस्क्रीन पत्नी ‘मंजू शर्मा’ या भूमिकेमुळे घराघरात पोहोचलेल्या सुमोनाने सोशल मीडियावर एक भावनिक पोस्ट शेअर करत आपल्या प्रकृतीबाबत माहिती दिली.

सुमोनाने सांगितले की, तिला अनेक वर्षांपासून ‘एंडोमेट्रिओसिस’ या आजाराचा त्रास होता. औषधोपचार आणि इतर उपचारांद्वारे हा आजार नियंत्रणात ठेवण्याचा प्रयत्न सुरू होता. मात्र, कालांतराने हा आजार वाढत गेला. त्यामुळे ४ मे रोजी तिच्यावर एंडोमेट्रिओसिस काढून टाकण्यासाठी शस्त्रक्रिया करण्यात आली. या शस्त्रक्रियेनंतर तिला शारीरिक आणि मानसिकदृष्ट्या सावरण्यासाठी वेळ लागला. त्यामुळेच ती जवळपास दोन महिने सोशल मीडिया आणि प्रसिद्धीपासून दूर राहिली.

 

View this post on Instagram

 

तिने आपल्या पोस्टमध्ये लिहिले की, “खूप दिवसांनी पुन्हा तुमच्यासमोर येत आहे. गेल्या दोन महिन्यांपासून मी जाणीवपूर्वक जगापासून आणि सोशल मीडियापासून थोडी अलिप्त राहिले होते. शस्त्रक्रियेनंतर स्वतःला सावरणे माझ्यासाठी सर्वात महत्त्वाचे होते. आता मात्र मी पूर्णपणे बरी असून पुन्हा नव्या उमेदीने आयुष्याकडे पाहत आहे.”

सुमोनाने तिच्यावर उपचार करणाऱ्या डॉक्टरांचे आणि रुग्णालयातील संपूर्ण वैद्यकीय कर्मचाऱ्यांचे मनापासून आभार मानले. “हे डॉक्टर माझ्यासाठी देवदूतच आहेत. त्यांनी माझी खूप काळजी घेतली. त्यांच्या ऋणात मी कायम राहीन,” असे तिने नमूद केले.

तिने स्पष्ट केले की, ही पोस्ट प्रसिद्धी मिळवण्यासाठी किंवा सहानुभूती मिळवण्यासाठी नाही. या अनुभवामुळे तिच्या आयुष्याकडे पाहण्याचा दृष्टिकोन पूर्णपणे बदलला आहे, हे सांगण्यासाठीच तिने ही माहिती चाहत्यांसोबत शेअर केली. कठीण काळातून बाहेर पडताना मानसिक आरोग्य आणि स्वतःची काळजी घेणे किती महत्त्वाचे असते, याचीही तिला नव्याने जाणीव झाल्याचे तिने सांगितले.

Sumona Chakravarti

याशिवाय सुमोनाने सोशल मीडियाविषयीही आपले मत मांडले. काही काळासाठी तिने व्हॉट्सॲप आणि इन्स्टाग्राम पूर्णपणे डिलीट करण्याचाही विचार केला होता. मात्र, आपल्या कामामुळे ते शक्य नसल्याचे तिच्या लक्षात आले. त्यामुळे सोशल मीडिया सोडण्याऐवजी तो वापरण्याची पद्धत बदलण्याचा निर्णय तिने घेतला आहे.

तिने सांगितले की, ‘लाइक्स’, ‘कमेंट्स’ आणि ‘फॉलोअर्स’च्या संख्येपेक्षा अर्थपूर्ण संवाद अधिक महत्त्वाचा आहे. विशेषतः महिलांसाठी अशी एक सकारात्मक कम्युनिटी तयार करण्याची तिची इच्छा आहे, जिथे शारीरिक आणि मानसिक आरोग्य, एंडोमेट्रिओसिस, पेरीमेनोपॉज, प्रवास, पुस्तके, झाडे, पाळीव प्राणी, खाद्यसंस्कृती, स्वावलंबी जीवन, अविवाहित राहण्याचा निर्णय, मुलं नको असण्याचा निर्णय किंवा ‘DINK’ जीवनशैली यांसारख्या विषयांवर मोकळेपणाने चर्चा करता येईल.

सध्या या कल्पनेची अंमलबजावणी कशी करायची हे निश्चित नसले, तरी भविष्यात अशी जागा निर्माण करण्याची इच्छा तिने व्यक्त केली आहे.

सुमोना चक्रवर्ती ही छोट्या पडद्यावरील लोकप्रिय अभिनेत्री असून ‘कॉमेडी नाइट्स विथ कपिल’मधील तिची भूमिका आजही प्रेक्षकांच्या लक्षात आहे. त्यानंतर ती ‘खतरों के खिलाडी १४’मध्येही सहभागी झाली होती. तसेच रणबीर कपूरच्या ‘बर्फी’ चित्रपटातही तिने महत्त्वाची भूमिका साकारली होती. आता प्रकृतीत सुधारणा झाल्यानंतर सुमोना पुन्हा एकदा मनोरंजनविश्वात सक्रिय होण्यास सज्ज असल्याचे तिच्या पोस्टवरून दिसून येते.