War Updates:  मध्यपूर्वेतील संघर्ष अधिक तीव्र होत असताना संयुक्त अरब अमिराती (UAE) लवकरच इराणविरुद्धच्या युद्धात उघडपणे उतरू शकते, अशी शक्यता व्यक्त केली जात आहे. गेल्या काही आठवड्यांत इराणकडून सातत्याने होत असलेल्या हल्ल्यांमुळे यूएईचा संयम संपत चालल्याचे संकेत मिळत आहेत.

यूएईवर सर्वाधिक हल्ले- War Updates

गेल्या तीन आठवड्यांत इराणने यूएईवर 2,200 हून अधिक क्षेपणास्त्रे आणि ड्रोन हल्ले केले आहेत. इस्रायलनंतर सर्वाधिक फटका यूएईलाच बसला आहे. मात्र, यूएईच्या हवाई संरक्षण प्रणालीने 95 टक्क्यांहून अधिक हल्ले रोखले आहेत.

अमेरिकेच्या कारवाईत यूएई सहभागी होणार?  War Updates

डोनाल्ड ट्रम्प  (Donald Trump) प्रशासन इराणवर दबाव वाढवण्यासाठी जमिनीवरील कारवाईचा विचार करत असल्याच्या चर्चा आहेत. हॉर्मूज सामुद्रधुनी पुन्हा खुली करण्यासाठी अमेरिकेकडून लष्करी हस्तक्षेपाची शक्यता वर्तवली जात आहे. या पार्श्वभूमीवर यूएई अमेरिकेसोबत कारवाईत सहभागी होऊ शकते.

इराणला संशय आहे की अशी लष्करी कारवाई यूएईच्या भूमीवरून सुरू होऊ शकते. रशियाकडून मिळालेल्या माहितीनुसारही अशा हालचाली सुरू असल्याचा दावा इराणच्या अधिकाऱ्यांनी केला आहे.

अमेरिकेतील यूएईच्या राजदूतांनी स्पष्ट केले आहे की, केवळ युद्धविराम पुरेसा नाही, तर “निर्णायक निकाल” आवश्यक आहे. काही यूएईतील तज्ज्ञांनीही इराणविरोधी ठाम भूमिका घेतली आहे.

हेही वाचा – आणखी दोन LPG जहाजे सोडली; ‘मित्र देश’ म्हणून इराणकडून भारतीय टँकर्सना ‘हॉर्मूज’ मार्ग खुला

इस्रायलशी वाढते संबंध – War Updates

2020 मधील अब्राहम करारानंतर यूएई आणि इस्रायल यांच्यातील संबंध अधिक मजबूत झाले आहेत. व्यापार, तंत्रज्ञान आणि संरक्षण क्षेत्रात सहकार्य वाढले आहे. त्यामुळे इराण यूएईकडे संशयाने पाहत आहे.

यूएई-इराण तणावामागे अबू मूसा आणि तुंब या बेटांवरील वाद महत्त्वाचा आहे. 1971 मध्ये इराणने ही बेटे ताब्यात घेतली होती आणि आजही त्यावर नियंत्रण आहे. या बेटांवरून दोन्ही देशांमध्ये दीर्घकाळ तणाव आहे.

इराणला भीती आहे की युद्धाच्या पार्श्वभूमीवर यूएई ही बेटे ताब्यात घेण्याचा प्रयत्न करू शकते. इराणच्या संसदेचे सभापती मोहम्मद बाघेर घालिबाफ (Mohammad Bagher Ghalibaf ) यांनी इशारा दिला आहे की, अशा कोणत्याही हालचालीला कडक प्रत्युत्तर दिले जाईल.

यूएईतील लक्ष्यांची यादी – War Updates

इराणने यूएईतील संभाव्य लक्ष्यांची यादीही जाहीर केली आहे. यात उर्जा प्रकल्प, अणुऊर्जा केंद्रे, डीसॅलिनेशन प्लांट्स आणि इतर महत्त्वाची पायाभूत सुविधा यांचा समावेश आहे.

हेही वाचा –  येमनकडून इस्रायलवर क्षेपणास्त्र हल्ला; हॉर्मूजनंतर आता लाल समुद्रातील व्यापारी मार्ग धोक्यात? 

यूएई इराणच्या निशाण्यावर का?

इराणचा आरोप आहे की यूएईने या युद्धात सुरुवातीपासूनच अप्रत्यक्ष भूमिका बजावली आहे. यूएईतील अल धफ्रा एअर बेससह अमेरिकन तळांवर हल्ले करण्यात आले आहेत. दुबई आणि अबुधाबीतील विमानतळ, बंदरे आणि इमारतींनाही लक्ष्य करण्यात आले.

इराणचा दावा आहे की यूएईने अमेरिकेला आणि इस्रायलला माहिती पुरवण्यासाठी प्रगत तंत्रज्ञान (AI) वापरले. तसेच काही हल्ल्यांसाठी यूएईची भूमी वापरली गेल्याचा संशयही व्यक्त करण्यात आला आहे.

भारतासाठीही महत्त्वाचे परिणाम –

यूएई युद्धात उतरल्यास भारतावरही त्याचे परिणाम होऊ शकतात. यूएईमध्ये सुमारे 45 लाख भारतीय राहतात, जे एकूण लोकसंख्येच्या सुमारे 40 टक्के आहेत. त्यामुळे भारत या संघर्षाकडे अत्यंत संवेदनशीलतेने पाहत आहे. पंतप्रधान  नरेंद्र मोदी (Narendra Modi ) यांनी यापूर्वी यूएईचे राष्ट्रपती मोहम्मद बिन झायेद अल नह्यान  (Mohamed bin Zayed Al Nahyan) यांच्याशी चर्चा करून भारतीयांच्या सुरक्षिततेबाबत आभार मानले होते.

दरम्यान, एकूणच, वाढते हल्ले, प्रादेशिक राजकारण, जुने भूभाग वाद आणि अमेरिकेची रणनीती या सर्व घटकांमुळे यूएई युद्धात सहभागी होण्याची शक्यता वाढली आहे. त्यामुळे मध्यपूर्वेतील संघर्ष आणखी व्यापक होण्याची भीती व्यक्त केली जात आहे.