दोहा – फुटबॉल विश्वचषकाच्या अंतिम सामन्यात अर्जेंटिनाने फ्रान्सचा पराभव करत विजेतेपद पटकावले. तिसऱ्यांदा ही ट्रॉफी जिंकण्यात त्यांना यश आले. यापूर्वी अर्जेंटिना 1978 आणि 1986 मध्ये चॅम्पियन झाला होता. कर्णधार लिओनेल मेस्सी रविवारी (18 डिसेंबर) कतारमधील लुसेल स्टेडियमवर ट्रॉफी उचलण्यासाठी गेला तेव्हा एक विचित्र दृश्य पाहायला मिळाले. ट्रॉफी स्विकारण्यापूर्वी मेस्सीने काळ्या रंगाचा कोट परिधान केला होता. हे पाहून चाहते आश्चर्यचकित झाले. विश्वचषकात प्रथमच असे घडले.

विश्‍वविजेतेपदाचा करंडक स्वीकारताना मेस्सीने काळा कोट का परिधान केला, असा प्रश्‍न निर्माण झाला होता. मात्र, अरब देशांतील मानसन्मानाचाच भाग असलेले हे काळ्या रंगाचे कोटसारखे वस्त्र कौतुक करताना प्रदान केले जाते व त्यानंतर सन्मान केला जातो. या काळ्या रंगाच्या वस्त्राला बिश्‍त असे संबोधले जाते. कतारच्या राजाने हे वस्त्र मेस्सीला प्रदान केले. मात्र, चाहत्यांनी त्यावरही उलट सुलट चर्चा सुरू केली असून असे वस्त्र परिधान करणे फिफाच्या नियमात बसते का, असा सवालही उपस्थित केला आहे.

उंटाचे केस आणि बकरीच्या लोकरीपासून बनवले जाते बिश्त …

हा बिश्‍त बनवण्यासाठी उंटाचे केस आणि बकरीचे लोकर वापरतात. धार्मिक नेत्यांव्यतिरिक्त, फक्त राजघराण्यातील लोक बिश्त घालतात. कतारचे अमीर तमीम बिन हमाद अल थानी यांनी मेस्सीला ते परिधान केले. यावेळी फिफा प्रमुख जिया इन्फँटिनोही तेथे उपस्थित होते.

#FIFAWorldCup। फ्रान्सचा पराभव चाहत्यांच्या जिव्हारी; पॅरिससह अनेक शहरांमध्ये तोडफोड आणि हिंसाचार, पहा व्हिडिओ..

दरम्यान,  अर्जेंटिनाकडून पहिल्या हाफमध्ये लिओनेल मेस्सी आणि एंजल डी मारिया यांनी प्रत्येकी एक गोल केला. कायलियन एमबाप्पेने फ्रान्ससाठी पुनरागमन केले आणि सलग दोन गोल केले. निर्धारित 90 मिनिटांनंतर स्कोअर 2-2 असा बरोबरीत राहिल्याने सामना अतिरिक्त वेळेत गेला. तेथे दोन्ही संघांना प्रत्येकी 15-15 मिनिटांचे दोन हाफ मिळाले.

लिओनेल मेस्सीने 108व्या मिनिटाला गोल करून अर्जेंटिनाला सामन्यात 3-2 अशी आघाडी मिळवून दिली. पुन्हा एकदा अर्जेंटिना विजयाच्या उंबरठ्यावर असल्याचे दिसत होते, परंतु किलियन एमबाप्पे पुन्हा त्यांच्या मार्गात उभा राहिला. त्याने 117व्या मिनिटाला गोल करून सामना 3-3 असा बरोबरीत आणला. यानंतर सामना पेनल्टी शूटआऊटपर्यंत पोहोचला. तिथे अर्जेंटिनाने हा सामना 4-2 असा जिंकला.