पुणे – शाळेने ठरवलेल्या दुकानांतूनच विद्यार्थ्यांना पुस्तके, गणवेश व साहित्य खरेदी करावे लागते. खासगी शाळांची ही प्रथा बंद करण्यासाठी शासनाने निर्णय घेतला पाहिजे, अशी मागणी आमदार रवींद्र धंगेकर यांनी शिक्षणमंत्री दीपक केसरकर यांच्याकडे केली आहे.

खासगी शाळा विद्यार्थी, पालकांना निवडक दुकानातूनच शैक्षणिक विकत घेण्यास भाग पाडतात. त्याबाबतचा फतवाच काढला जात असतो. संबंधित ठिकाणच्या साहित्याचा दर्जा निकृष्ट असतो. त्याला पालकांकडून विरोधही केला जातो. मात्र, मुलांना त्रासदायक ठरू शकते म्हणून पालक तक्रारी करत नाहीत. या प्रथेला दिल्ली सरकारने झटका देत, असा नियम लावल्यास संबंधित शाळांवर कारवाईचा बडगाच उगारला आहे.

त्यास धर्ती महाराष्ट्र राज्य शासनानेही अधिसूचना काढल्यास पालकांना दिलासा मिळणार आहे, असे धंगेकर यांनी म्हटले आहे. खासगी शाळांकडून शुल्क वाढही केली जात आहे. त्यातच आता ठराविक दुकानातूनच साहित्य खरेदी करण्याचा शाळांकडून लावण्यात येत असलेल्या तगाद्यामुळे पालक आणखी हैराण झालेले आहेत, असे धंगेकर यांनी स्पष्ट केले आहे.