नवी दिल्ली – एनसीएईआरच्या महासंचालक पूनम गुप्ता यांची रिझर्व्ह बँकेच्या डेप्युटी गव्हर्नरपदी नियुक्‍ती करण्‍यात आली आहे. ही नियुक्‍ती तीन वर्षांसाठी करण्‍यात आली आहे. एम. डी. पात्रा हे जानेवारीत निवृत्‍त झाल्‍याने त्‍यांच्‍या जागी सदर नियुक्‍ती करण्‍यात आली आहे.

सूत्रांनी सांगितले की, नियुक्ती समिती ऑफ कॅबिनेटने (एसीसी) गुप्ता यांची आरबीआयमध्ये पदावर रुजू झाल्यापासून तीन वर्षांसाठी डेप्युटी गव्हर्नरपदी नियुक्ती करण्यास मान्यता दिली. सध्या, पूनम गुप्ता भारतातील सर्वात मोठी आर्थिक धोरण थिंक टँक असलेल्या नॅशनल कॉन्सिल ऑफ अप्लाइड इकॉनॉमिक रिसर्चच्या (एनसीएईआर)  महासंचालक आहेत.

तसेच, पंतप्रधानांच्या आर्थिक सल्लागार परिषदेच्या सदस्या आणि 16व्या वित्त आयोगाच्या सल्लागार परिषदेच्या संयोजक देखील आहेत. वॉशिंग्टन डीसीमध्ये आयएमएफ आणि जागतिक बँकेत सुमारे दोन दशके वरिष्ठ पदांवर काम केल्यानंतर २०२१ मध्ये त्या एनसीएईआरमध्ये रुजू झाल्या.

गुप्ता यांनी मेरीलँड विद्यापीठ (यूएसए) येथील दिल्ली स्कूल ऑफ इकॉनॉमिक्समध्ये अध्यापन केले आणि दिल्लीतील आयएसआय येथे अभ्यागत प्राध्यापक म्हणून काम केले आहे. त्या एनआयपीएफपी येथे आरबीआय चेअर प्रोफेसर आणि आयसीआरआयईआर येथे प्राध्यापक देखील राहिल्या आहेत. गुप्ता यांनी अमेरिकेतील मेरीलँड विद्यापीठातून अर्थशास्त्रात पदव्युत्तर पदवी, पीएचडी आणि दिल्ली विद्यापीठातील दिल्ली स्कूल ऑफ इकॉनॉमिक्समधून अर्थशास्त्रात पदव्युत्तर पदवी घेतली आहे.